ᕿᑭᖅᑖᓗᒃ ᑯᐊᐳᕇᓴᓐ ᓇᓪᓕᐅᓐᓂᖅᓯᐅᕈᑎᖃᖅᐳᑦ 2026-ᒥ ᐃᓕᓐᓂᐊᖅᑏᑦ ᑮᓇᐅᔭᖅᑎᒍᑦ ᐃᑲᔪᖅᑕᐅᔾᔪᑎᓂᒃ ᐱᑖᖅᑐᒥᓂᕐᓂᒃ
ᐃᖃᓗᐃᑦ, ᓄᓇᕗᑦ – ᒪᐃ 1, 2026: ᕿᑭᖅᑖᓗᒃ ᑯᐊᐳᕇᓴᓐ ᐅᐱᒍᓱᑉᐳᑦ ᓇᓪᓕᐅᓐᓂᖅᓯᐅᕐᓂᖏᖕᓂᒃ 2026-ᒥ ᐃᓕᓐᓂᐊᖅᑏᑦ ᑮᓇᐅᔭᓂᒃ ᐃᑲᔫᓯᐊᖅᑖᖅᑐᒥᓂᐅᔪᑦ ᐃᓕᓐᓂᐊᖅᑏᑦ ᑮᓇᐅᔭᖅᑎᒍᑦ ᐃᑲᔫᓯᐊᖏᑦ ᐱᓕᕆᐊᖓᑎᒍᑦ, ᐃᓕᓴᕆᓪᓗᒋᑦ ᑎᓴᒪᑦ ᐱᓕᕆᒃᑲᒻᒪᕆᐊᓗᐃᑦ ᓄᓇᕗᒻᒥᐅᑦ ᐃᓕᓐᓂᐊᖅᑎᐅᔪᑦ ᐊᒻᒪᓗ ᓯᕗᓕᖅᑎᕈᖅᐸᓪᓕᐊᔪᑦ ᐃᓕᓐᓂᐊᕆᐊᖅᓯᒪᔪᑦ ᓯᓚᑦᑐᖅᓴᕐᕕᖕᒧᑦ, ᐃᖅᑲᓇᐃᔮᕆᔪᒪᓛᖅᑕᒥᓄᑦ ᐱᕙᓪᓕᐊᓂᖃᖅᑐᑦ, ᐊᒻᒪᓗ ᐃᑲᔪᖅᑐᑦ ᓄᓇᓕᖏᖕᓄᑦ. ᑕᒪᒃᑯᐊ ᑮᓇᐅᔭᖅᑎᒍᑦ ᐃᑲłᔫᓯᐊᖅᑖᖅᑐᑦ ᐃᓕᓐᓂᐊᖅᑏᑦ ᑐᓂᔭᐅᓯᒪᕗᑦ ᐅᑯᓄᖓ ᕿᑭᖅᑖᓗᒃ ᐱᖁᑎᓕᕆᔨᒃᑯᑦ ᑎᒥᖓᓄᑦ, ᕿᑭᖅᑖᓗᒃ ᐃᖃᓗᓕᕆᔨᒃᑯᑦ ᑯᐊᐳᕇᓴᙵ, ᕿᑭᖅᑖᓗᒃ ᑯᐊᐳᕇᓴᓐ ᐃᑲᔪᓕᕆᔨᒃᑯᑦ ᐊᕕᑦᑐᖅᓯᒪᓂᖓ ᐊᒻᒪᓗ ᕿᑭᖅᑖᓗᒃ ᑯᐊᐳᕇᓴᓐ ᐊᖓᔪᖅᑳᖃᕐᕕᖓ.ᓄ
ᑕᒫᓂ ᐊᕐᕌᒍᒥ ᑮᓇᐅᔭᐅᖅᑖᖅᑎᑕᑦ ᐃᓕᓐᓂᐊᖅᑏᑦ ᐊᒪᕆᓐᑕ ᐊᓚᐃᙵ, ᕼᐅᕋᐃᔭᓐ ᕕᓕ, ᔫᓯ ᑰᑕᐃ, ᐊᒻᒪᓗ ᕙᐃᓐ ᒪᐃᑯ. ᐊᑐᓂ ᑮᓇᐅᔭᓂᒃ ᐊᐃᑦᑐᖅᑕᐅᔪᖅ ᐱᒻᒪᕆᒍᓱᖃᐅᕐᒪᑕ ᐃᓕᓐᓂᐊᖅᑎᓄᑦ ᑮᓇᐅᔭᑦ ᐃᑲᔫᓯᐊᑦ ᐱᓕᕆᐊᖓᓂᒃ ᐱᕚᓪᓕᕈᑎᒋᔭᐅᓇᓱᐊᖅᑐᓂᒃ ᐃᖅᑲᓇᐃᔮᖃᐃᓐᓇᕐᓗᑕ ᑕᒪᑉᑕ ᐃᓕᓐᓂᐊᕐᓂᕐᒧᑦ, ᓄᓇᓕᒻᒧᑦ ᑲᒪᒋᔭᖃᐃᓐᓇᕐᓂᐊᕐᓂᕐᒥᒃ, ᑲᓱᖅᓯᒪᓂᖏᕐᒧᑦ ᐃᓕᖅᑯᓯᕐᒧᑦ, ᐊᒻᒪᓗ ᓯᕗᓕᖅᑎᐅᓂᕐᒥᒃ ᓄᓇᕗᑉ ᓯᕗᓂᒃᓴᖓᓄᑦ. ᑕᒪᒃᑯᐊ 2026-ᒥ ᐃᓕᓐᓂᐊᖅᑏᑦ ᑮᓇᐅᔭᓂᒃ ᐃᑲᔫᓯᐊᖅᑖᖅᑐᑦ ᐃᓚᒋᔭᐅᓂᐊᓕᖅᑐᑦ ᐊᒥᓱᕈᖅᐸᓪᓕᐊᔪᑯᓗᓐᓄᑦ ᑎᑎᖅᑐᖅᓯᒪᔪᑦ ᐊᑎᖏᑦ ᐱᖃᑦᑕᕐᓂᑰᔪᑦ ᐃᑲᔫᑎᓂᒃ ᑮᓇᐅᔭᓂᒃ. ᐃᓕᓐᓂᐊᖅᑏᑦ ᑮᓇᐅᔭᖅᑎᒍᑦ ᐃᑲᔫᑕᐅᓂᖓᓂᒃ ᐃᑲᔪᖅᑐᖅᑕᐅᓯᒪᓪᓗᑎᑦ ᕿᑭᖅᑖᓗᒃ ᑯᐊᐳᕇᓴᓐ−ᒃᑯᓐᓄᑦ ᐊᕐᕌᒍᑦ ᐊᓂᒍᖅᓯᒪᔪᓄᑦ, ᑭᒡᒐᖅᑐᐃᔪᑦ ᕿᑭᖅᑖᓗᒃ ᑯᐊᐳᕇᓴᙵᑕ ᑮᓇᐅᔭᓂᒃ ᐊᑐᐃᓐᓇᕐᓂᖏᑦ ᐃᓄᐃᑦ ᐃᓕᓐᓂᐊᕐᓂᖏᖕᓄᑦ, ᓯᕗᓕᖅᑎᐅᓂᖏᖕᓄᑦ, ᐊᒻᒪᓗ ᓄᓇᓕᐅᔪᑦ ᑲᔪᓯᓂᖃᐃᓐᓇᑦᑎᐊᕐᓂᖏᖕᓄᑦ ᐱᕚᓪᓕᕐᓗᑎᑦ.
ᐊᒪᕆᓐᑕ ᐊᓚᐃᙵ ᐃᖃᓗᒻᒥᐅᖅ, ᓄᓇᕗᑦ, ᐃᓄᒃᓱᒃ ᐃᓕᓐᓂᐊᕐᕕᐊᓗᒻᒥ ᐃᓕᓐᓂᐊᕇᓚᐅᖅᓯᒪᔪᖅ ᔫᓂ 2025−ᖑᑎᓪᓗᒍ ᐊᒻᒪᓗ ᐱᖓᓱᓄᑦ ᐊᕐᕌᒍᓄᑦ ᓯᓚᑦᑐᖅᓴᕐᕕᕐᔪᐊᕐᒥ ᐃᓕᓐᓂᐊᖅᑐᖅ ᐋᓐᓂᐊᓯᐅᖅᑎᕈᕐᓂᕐᒧᑦ ᐱᖓᓐᓇᒥ ᓯᓚᑦᑐᖅᓴᕐᕕᕐᔪᐊᖓᓂ. ᓴᐱᓕᔪᐃᑦᑑᓂᖓ ᑲᒪᒋᔭᖃᐃᓐᓇᑦᑎᐊᕐᓂᖓᓗ ᐃᓕᓐᓂᐊᖅᖢᓂ ᐊᒻᒪᓗ ᑲᒪᒋᔭᖃᐃᓐᓇᕐᓂᖓ ᐃᖅᑲᓇᐃᔮᕆᔪᒪᓛᕐᑕᒥᓄᑦ ᑲᒪᐃᓐᓇᖅᖢᓂ ᐱᔨᑦᑎᕋᕈᑎᖃᕐᓗᓂ ᓄᓇᓕᖓᓄᑦ ᑭᒡᒐᖅᑐᐃᔪᖅ ᐃᓄᐃᑦ ᐃᓕᓐᓂᐊᕈᒪᑦᓯᐊᓲᖑᓂᖏᖕᓂᒃ ᐊᒻᒪᓗ ᓯᕗᓕᖅᑎᐅᓂᖏᖕᓂᒃ.
ᕼᐅᕋᐃᔭᓐ ᕕᓕ ᐃᒃᐱᐊᕐᔪᖕᒥᐅᖅ, ᓄᓇᕗᑦ, ᐃᓕᓐᓂᐊᖅᑐᖅ ᑐᓵᔨᐅᓂᕐᒧᑦ ᑐᑭᓕᐅᕆᓂᕐᒧᓪᓗ, ᓴᙵᑦᑎᑦᑎᓂᖃᖅᑐᖅ ᑲᓱᖅᓯᒪᓂᖏᑦ ᓄᓇᓕᖓᑕ ᐅᖃᐅᓯᒃᑯᑦ ᑐᓴᐅᒪᑎᑦᑎᓂᒃᑯᓪᓗ. ᑐᙵᕕᖃᑦᑎᐊᖅᑐᓂ ᐃᓕᖅᑯᓯᕐᒥᖕᓂᒃ ᐱᖅᑯᓯᑐᖃᖅᑎᒍᑦ ᐊᖑᓇᓱᒃᐸᓐᓂᖓᒍᑦ ᐊᒻᒪᓗ ᒥᖅᓱᖃᑦᑕᕐᓂᒃᑯᑦ, ᕼᐅᕋᐃᔭᓐ ᐃᒃᐱᐊᕐᔪᑉ ᖃᓄᐃᑦᑑᓂᖓᓂᒃ ᓇᒃᓴᐃᓐᓇᐅᔭᙳᐊᖅᑐᖅ ᓇᒧᙵᕐᓂᑕᒫᑦ.
ᔫᓯ ᑰᑕᐃ ᐃᖃᓗᒻᒥᐅᖅ, ᓄᓇᕗᑦ, ᐃᓕᓐᓂᐊᕇᕋᑖᓚᐅᖅᑐᖅ ᐊᕙᑎᓕᕆᓂᕐᒧᑦ ᐃᓕᓐᓂᐊᕋᒃᓴᒥᒃ ᓄᓇᕗᑦ ᓯᓚᑦᑐᖅᓴᕐᕕᖓᓂ. ᐃᓅᓚᐅᖅᓯᒪᓪᓗᓂ ᐃᖃᓗᓐᓂ ᐱᕈᖅᓴᔭᒥᓂᐅᓪᓗᓂᓗ, ᔫᓯ ᖁᕕᐊᒋᔭᓕᒃ ᓄᓇᑐᐃᓐᓇᕐᒧᑦ ᐊᐅᓪᓚᖅᓯᒪᓪᓗᓂ ᐊᒻᒪᓗ ᐊᖑᓇᓱᒃᒍᒻᒪᐅᓪᓗᓂ ᐊᒻᒪᓗ ᐊᒥᓱᓂᒃ ᐊᕐᕌᒍᓂᑦ ᕼᐊᑭᖅᑎᐅᖃᑦᑕᖅᓯᒪᓕᖅᑐᖅ ᐊᒻᒪᓗ ᐊᑭᓕᖅᓱᖅᑕᐅᓐᓇᓂ ᐱᓕᕆᖃᑦᑕᖅᓯᒪᔪᖅ ᕼᐊᑭᖅᑏᑦ ᑲᑐᔾᔨᖃᑎᒌᖏᖕᓄᑦ ᐃᖃᓗᓐᓂ.
ᕙᐃᓐ ᒪᐃᑯ ᐸᖕᓂᖅᑑᕐᒥᐅᖅ, ᓄᓇᕗᑦ, ᐃᓕᓐᓂᐊᕇᕋᑖᓚᐅᖅᑐᖅ ᒪᕐᕉᓐᓄᒃ ᐊᕐᕌᒎᓐᓄᒃ ᐊᕙᑎᓕᕆᓂᕐᒧᑦ ᐃᓕᓐᓂᐊᕋᒃᓴᒥᒃ ᐃᖃᓗᓐᓂ, ᐆᑦᑐᕋᕐᓂᒃᑯᑦ ᓄᓇᑐᐃᓐᓇᕐᒥ ᐱᓕᒻᒪᒃᓴᖅᓯᒪᓕᖅᑐᓂ ᐊᒻᒪᓗ ᐊᕙᑎᒥ ᓇᐅᑦᓯᖅᑐᕐᓂᕐᒥᒃ. ᐅᐱᒍᓱᑦᑎᐊᖅᑐᓂ ᓄᓇᕗᒻᒥᐅᖅ ᑲᓱᖅᓯᒪᔪᒻᒪᕆᐅᔪᖅ ᓄᓇᒧᑦ, ᕙᐃᓐ ᑭᒡᒐᖅᑐᐃᔪᖅ ᓄᓇᓕᒻᒥᓂᒃ ᐊᔪᕈᓐᓂᖅᓯᒪᔪᑯᓘᓂᖓᓄᑦ ᐃᑲᔪᕐᓂᖃᓪᓚᕆᒃᑲᔭᖅᑐᖅ ᓄᓇᕗᑉ ᓯᕗᒃᓴᖓᓂ.
ᕿᑭᖅᑖᓗᒃ ᑯᐊᐳᕇᓴᓐ ᐃᓕᓐᓂᐊᖅᑏᑦ ᑮᓇᐅᔭᓂᒃ ᐱᔾᔪᓯᐊᖅᑎᑦᑎᒍᑎᖓᑎᒍᑦ, ᕿᑭᖅᑖᓗᒃ ᑯᐊᐳᕇᓴᓐ ᑮᓇᐅᔭᓂᒃ ᐊᑐᐃᓐᓇᖅᑐᑦ ᐃᓄᐃᑦ ᐃᓕᓐᓂᐊᕐᓂᖏᖕᓄᑦ, ᓯᕗᓕᖅᑎᐅᓂᖏᖕᓄᑦ, ᐊᒻᒪᓗ ᓄᓇᓕᓐᓂ ᐱᕙᓪᓕᐊᓂᖏᖕᓄᑦ. ᐱᓕᕆᐊᖅ ᐃᑲᔪᖅᑐᐃᔪᖅ ᐃᓕᓐᓂᐊᖅᑎᓂᒃ ᓯᓚᑦᑐᖅᓴᕐᕕᒻᒥ ᐃᓕᓐᓂᐊᖅᑎᓪᓗᒋᑦ ᐱᓕᒻᒪᒃᓴᖅᑎᓪᓗᒋᓪᓗ ᐊᔪᕈᓐᓃᖅᓴᓯᓐᓈᑦ ᑭᓱᓕᕆᓗᑎᑦ, ᖃᐅᔨᒪᓂᖅᓴᐅᓕᕐᓗᑎᑦ, ᐊᒻᒪᓗ ᓇᓗᖅᑯᑎᙱᑦᑎᐊᓕᖅᑐᑎᑦ ᐃᑲᔪᖁᓪᓗᒋᑦ ᓄᓇᕗᑦ ᐱᕈᖅᐸᓪᓕᐊᓂᖓᓄᑦ.
“ᐃᓕᓐᓂᐊᕐᓂᖅ ᓴᙱᓛᖑᕗᖅ ᐊᑐᕈᓐᓇᖅᑕᕗᑦ ᐃᑲᔫᑎᒋᓗᒍ ᓄᓇᕗᑉ ᓯᕗᒃᓴᖃᑦᓯᐊᖁᓪᓗᒍ,” ᐅᖃᖅᑐᓂ Hᐃᐅᕆ ᕕᓕᐅᕆᑎ, ᐊᖓᔪᖅᑳᖅ ᐊᒻᒪᓗ ᐊᐅᓚᑦᓯᔨᒻᒪᕆᒃ ᕿᑭᖅᑖᓗᒃ ᑯᐊᐳᕇᓴᙵᓄᑦ. “ᐅᐱᒍᓱᑉᐳᒍᑦ ᐃᓕᓴᖅᓯᒍᓐᓇᕋᑦᑕ ᐊᒥᕋᓐᑕᒥᒃ, ᕼᐅᕋᐃᔭᓐ−ᒥᒃ, ᔫᓯᒥᒃ, ᐊᒻᒪᓗ ᕙᐃᓐ−ᒥᒃ ᐊᒃᓱᕈᖅᑐᑎᑦ ᐃᖅᑲᓇᐃᔮᖃᖅᓯᒪᓂᖏᖕᓄᑦ, ᓴᐱᓕᔪᐃᑦᑑᓂᖏᖕᓄᑦ, ᐊᒻᒪᓗ ᑲᒪᒋᔭᖃᐃᓐᓇᕐᓂᖏᖕᓄᑦ ᓄᓇᓕᒻᒥᓂᒃ ᐱᔨᑦᓯᖅᑐᑎᑦ. ᐊᑐᓂ ᑭᒡᒐᖅᑐᐃᓪᓚᕆᒃᑐᑦ ᑭᖑᕚᕆᔭᐅᓛᖅᑐᓂᒃ ᐃᓄᐃᑦ ᓯᕗᓕᖅᑎᐅᓛᖅᑐᑎᑦ.
ᕿᑭᖅᑖᓗᒃ ᑯᐊᐳᕇᓴᓐ ᖁᕕᐊᓲᑎᖃᖅᑐᑦ ᑕᒪᐃᓐᓂ ᑎᓴᒪᓂᒃ 2026-ᒥ ᐃᓕᓐᓂᐊᖅᑏᑦ ᑮᓇᐅᔭᖅᑎᒍᑦ ᐊᐃᑦᑑᓯᐊᖅᓯᒪᔪᑦ ᐊᒻᒪᓗ ᑲᔪᓯᓂᖃᐃᓐᓇᑦᓯᐊᖁᒐᓗᐊᖅᑐᑎᒍᑦ ᐃᓕᓐᓂᐊᕐᓂᖏᓐᓂᒃ, ᐃᖅᑲᓇᐃᔮᕐᒥᓂᒃ, ᐊᒻᒪᓗ ᓄᓇᓕᓐᓂ ᓯᕗᓕᖅᑎᐅᓂᖏᓐᓂᒃ.
ᕿᑭᖅᑖᓗᒃ ᑯᐊᐳᕇᓴᓐ ᒥᒃᓵᓄᑦ
ᕿᑭᖅᑖᓗᒃ ᑯᐊᐳᕇᓴᓐ ᑕᐃᑲᙶᖓᔪᖅ ᑯᐊᐳᕇᓴᓐ ᑭᒡᒐᖅᑐᐃᓪᓗᓂ ᐅᖓᑖᓃᑦᑐᓂᑦ 16,000 ᐃᓄᐃᑦ ᐊᑎᓕᐅᖅᑕᐅᖃᑕᐅᓯᒪᔪᑦ ᓄᓇᕗᑦ ᐊᖏᕈᑎᖓᓄᑦ ᕿᑭᖅᑖᓗᒻᒥ 13-ᖑᔪᓂᑦ ᓄᓇᓕᓐᓂ ᓄᓇᕗᒻᒥ. ᕿᑭᖅᑖᓗᒃ ᑯᐊᐳᕇᓴᓐ ᑕᒪᒋᔭᖃᐃᓐᓇᕐᓂᐊᕐᓂᕋᖅᓯᒪᕗᑦ ᐱᕕᖃᖅᑎᑦᑎᑦᑎᐊᕐᓗᑎᑦ ᐃᓄᓐᓄᑦ ᐊᒻᒪᓗ ᐃᑲᔪᖅᑐᐃᓗᑎᑦ ᐃᓅᓯᖏᑦ ᐱᕙᓪᓕᐊᓂᕐᒧᓪᓗ ᐱᕈᖅᐸᓪᓕᐊᖁᓪᓗᒋᑦ ᕿᑭᖅᑖᓗᒻᒥᐅᑦ. ᐃᓕᓐᓂᐊᖅᑏᑦ ᑮᓇᐅᔭᖅᑎᒍᑦ ᐊᐃᑦᑑᓯᐊᖅᑎᑕᐅᓂᖏᑕ ᐱᓕᕆᐊᖓᒍᑦ ᐊᒻᒪᓗ ᓄᓇᓕᓐᓄᑦ ᑮᓇᐅᔭᓂᒃ ᐊᑐᖃᑦᑕᐃᓐᓇᕐᓂᑦᑎᒍᑦ, ᕿᑭᖅᑖᓗᒃ ᑯᐊᐳᕇᓴᓐ ᐅᐱᒍᓱᑉᐳᖅ ᐃᑲᔪᖅᑐᐃᖃᑦᑕᕐᓂᕐᒥᓂᒃ ᐃᓕᓐᓂᐊᕐᓂᕐᒥᒃ, ᓯᕗᓕᖅᑎᐅᓂᕐᒥᒃ, ᐊᒻᒪᓗ ᓴᙱᓂᖅᓴᒥᒃ ᓯᕗᓂᒃᓴᖃᓛᕐᓂᖓᓂᒃ ᓄᓇᕗᑦ.
ᐱᕙᓪᓕᐊᔪᓕᕆᔨᒃᑯᑦ ᖃᐅᔨᒋᐊᕈᓐᓇᖅᑐᑦ
ᑲᐃᑎ ᓴᑲᑦ | ᐊᖓᔪᖅᑳᖅ ᐊᖓᔪᖅᑳᖃᕐᕕᑉ ᐊᓪᓚᕝᕕᖓᓂ
kchoquette@qc.rp.ca
