ᕿᑭᖅᑖᓗᒃ ᑯᐊᐳᕇᓴᒃᑯᑦ ᑲᑐᔾᔨᖃᑎᖃᖅᑐᑎᒃ ᐃᖃᓗᓕᕆᓂᕐᒧᑦ ᑕᕆᐅᓕᕆᓂᕐᒧᓪᓗ ᑎᒥᖓᓂᒃ ᒥᒨᕆᐅ ᐃᓕᓐᓂᐊᕕᔾᔪᐊᖓᓂ ᑐᓴᖅᑎᑦᓯᔪᑦ ᐃᑦᓯᕙᐅᑕᖅᑖᒥᒃ ᕿᑭᖅᑕᓂ ᓄᓇᐅᑉ ᖃᓂᒋᔮᓂ ᐃᖃᓗᓕᕆᓂᕐᒧᑦ ᖃᐅᔨᓴᕐᓂᕐᒧᑦ, ᐱᓕᖕᒪᓴᓂᕐᒧᑦ ᐃᓕᓐᓂᐊᓂᕐᒧᓪᓗ
ᐃᖃᓗᐃᑦ, ᓄᓇᕗᑦ, ᐆᑦᑑᑉᐱᕆ 24, 2022
“ᕿᑭᖅᑖᓗᒃ ᑯᐊᐳᕇᓴᒃᑯᑦ (QC) ᖁᕕᐊᓱᑦᑐᑦ ᓯᕗᒧᐊᒃᑎᑦᑎᓂᕐᒥᒃ ᐊᖏᕈᑎᒋᓯᒪᔭᒥᓂᒃ ᕿᑭᖅᑕᓂ ᓄᓇᐅᑉ ᖃᓂᒋᔮᓂ ᐃᖃᓗᓕᕆᓂᕐᒥᒃ ᑲᑐᔾᔨᖃᑎᖃᕐᖢᑎᒃ ᐃᖃᓗᓕᕆᓂᕐᒧᑦ ᑕᕆᐅᓕᕆᓂᕐᒧᓪᓗ ᑎᒥᖓᓂᒃ (MI) ᒥᒨᕆᐅ ᐃᓕᓐᓂᐊᕕᔾᔪᐊᖓᓂᒃ ᓅᕕᓐᓚᓐ ᓛᐸᑐᐊᒥ (MUN) ᓴᖅᑮᓂᕐᒥᒃ QC−ᑯᓃᑦᑐᒥᒃ ᐃᑦᓯᕙᐅᑕᖅᑖᒥᒃ ᕿᑭᖅᑕᓂ ᓄᓇᐅᑉ ᖃᓂᒋᔮᓂ ᐃᖃᓗᓕᕆᓂᕐᒧᑦ ᖃᐅᔨᓴᕐᓂᕐᒧᑦ, ᐱᓕᖕᒪᓴᕐᓂᕐᒧᑦ ᐃᓕᓐᓂᐊᓂᕐᒧᓪᓗ. ᐃᓂᒋᔭᐅᔪᖅ ᑕᒫᓃᑦᑐᖅ ᑐᑦᑕᕐᕕᒃ ᒪᑭᑉᐸᓪᓕᐊᑎᑦᓯᓂᕐᒧᑦ ᑕᕆᐅᕐᒥ ᐊᑐᕋᑦᓴᓂᒃ (CSAR) ᑕᕆᐅᓕᕆᔨᒃᑯᑦ ᑎᒥᖓᓂ”, ᐅᖃᖅᑐᖅ ᐲᑕ ᑮᓇᐃᓐᓇᖅ, ᐊᖓᔪᖅᑳᑉ−ᑐᒡᓕᐊ − ᐃᖃᓗᓕᕆᔨᒃᑯᖏᓐᓂ QC−ᑯᑦ.
ᑖᓐᓇ ᐃᓂᐅᔪᖅ ᑕᕝᕙᓃᑦᑐᖅ ᑕᓪᓕᒪᓂᒃ−ᐊᕐᕌᒍᓂᒃ ᐱᓇᓱᐊᖃᑎᒌᓐᓂᐊᕐᓂᖏᓐᓂᒃ ᕿᑭᖅᑖᓗᒃ ᑯᐊᐳᕇᓴᒃᑯᑦ , ᑕᕆᐅᓕᕆᔨᒃᑯᑦ ᑎᒥᖓ ᐊᒻᒪᓗ ᓄᓇᕗᒻᒥ ᓯᓚᑦᑐᓴᕐᕕᒃ ᐱᕙᓪᓕᐊᑎᑦᓯᓂᕐᒥᒃ ᐊᐅᓚᑦᓯᔪᓐᓇᖅᓯᕙᓪᓕᐊᓂᕐᒧᑦ ᐃᓕᓐᓂᐊᓂᕐᒥᒃ, ᐱᓕᖕᒪᒃᓴᐅᑎᓂᒃ, ᖃᐅᔨᓴᕐᓂᕐᒥᒃ ᐊᒻᒪᓗ ᐱᕙᓪᓕᐊᑎᑦᓯᓂᕐᒥᒃ ᓄᓇᐅᑉ ᖃᓂᒋᔮᓂ ᐃᖃᓗᓕᕆᓂᕐᒧᑦ ᖃᐅᔨᓴᕐᓂᕐᒥᒃ ᕿᑭᖅᑕᓂ ᓄᓇᖓᓂ ᓄᓇᕗᒻᒥ.
ᑭᐊᕕᓐ ᐋᓐᑐᓴᓐ, ᓂᐊᖁᕆᔭᐅᔪᖅ MI ᐃᓕᓐᓂᐊᕕᒻᒥ ᐃᖃᓗᓕᕆᓂᕐᒧᑦ ᐅᖃᖅᑐᖅ “ᑖᒃᑕ ᓯᑳᑦ ᒍᕌᓐᑦ, ᖃᐅᔨᒪᓂᓕᒻᒪᕆᒃ ᐱᓕᕆᐊᖃᖃᑦᑕᖅᓯᒪᔪᒻᒪᕆᐅᓂᕐᒥᒍᑦ ᐊᕙᑎᒐᓚᓐᓂᒃ ᐊᕐᕌᒍᓂᒃ ᐃᖃᓗᓕᕆᓂᕐᒧᑦ ᖃᐅᔨᓴᓂᕐᒥᒃ ᓄᓇᕗᒻᒥ ᐃᒃᓯᕙᐅᑕᐅᓂᐊᖅᑐᖅ. ᓯᑳᑦ ᓯᕗᓕᕐᓂᐊᖅᑐᖅ ᐃᓕᓐᓂᐊᓂᕐᒥᒃ, ᖃᐅᔨᓴᕐᓂᕐᒥᒃ ᐊᒻᒪᓗ ᐱᓕᖕᒪᒃᓴᐃᓂᕐᒥᒃ ᐱᓇᓱᐊᒐᐅᔪᓂᒃ ᑐᕌᖓᔪᓂᒃ ᐊᐅᓚᑦᓯᓂᕐᒥᒃ ᐊᒻᒪᓗ ᐱᑕᖃᕐᓂᖓᓂᒃ ᑕᕆᐅᒃᑯᑦ ᐊᑐᕋᑦᓴᓂᒃ ᓯᒡᔭᒥᐅᑕᕐᓂ ᓄᓇᓕᓐᓂ ᕿᑭᖅᑕᓂ ᓄᓇᖓᓂ, ᖃᓄᐃᖃᑦᑕᖅᓯᒪᓂᖏᓐᓂᒃ ᑖᒃᑯᓄᖓ ᐊᑦᑐᐊᔪᑦ ᐆᒪᔪᑦ ᖃᐅᔨᔭᐅᔪᒪᔪᑦ, ᐊᒻᒪᓗ ᐱᑕᖃᐃᓐᓇᕈᓐᓇᕐᓂᖓᓂᒃ ᐊᖑᓇᓲᓰᑦ ᐊᑐᕐᓗᒋᑦ ᐊᒻᒪᓗ ᐃᖃᓗᒐᓲᑏᑦ ᐊᕙᑎᒥᒃ ᐊᑦᑐᐃᓂᐅᓴᙱᓂᖅᓴᐅᔪᑦ ᐊᒻᒪᓗ ᒪᑭᑉᐸᓪᓕᐊᑎᑦᓯᓂᕐᒥᒃ ᐱᖅᑯᓯᒃᑯᑦ ᐊᕙᑎᒥᒃ ᖃᐅᔨᒪᓂᕐᒥᒃ.”
“ᑖᒃᑕ ᒍᕌᓐᑦ ᓯᕗᓕᖅᓯᒪᔪᖅ ᐱᓕᕆᐊᒥᒃ QC−ᑯᑦ ᓄᓇᐅᑉ ᖃᓂᒋᔮᓂ ᐃᖃᓗᓕᕆᓂᕐᒧᑦ ᖃᐅᔨᓴᓂᕐᒥᒃ ᐊᒻᒪᓗ ᐱᓕᖕᒪᑦᓴᕐᓂᕐᒥᒃ ᓘᑎ ᐸᓪᓗᖅ ᐅᒥᐊᕐᔪᐊᒃᑯᑦ ᐊᕐᕌᒎᖅᑲᐅᔫᓐᓂ ᒪᕐᕉᓂ, ᐱᒋᐊᖅᑎᑦᓯᓯᒪᓗᓂ ᐱᖕᒪᕆᐅᔪᒥᒃ ᓄᓇᓕᑦᑎᒍᑦ ᖃᐅᔨᓴᕐᓂᕐᒥᒃ ᓯᑕᒪᓂ ᐃᓚᒋᔭᐅᕕᐅᔪᓂ ᓄᓇᓕᓐᓂ ᕿᑭᖅᑕᓂ ᓄᓇᖓᓂ”, ᐅᖃᓚᐅᖅᑐᖅ ᔨᐅᕆ ᕗᐊᑦ, QC−ᑯᓐᓂ ᐃᖃᓗᓕᕆᔨᒃᑯᑦ ᑐᑭᒧᐊᒃᑎᑦᑎᔨᖓ, “ᑖᓐᓇ ᐃᑦᓯᕙᐅᑕᕐᒧᑦ ᐃᓂᐅᔪᖅ ᓯᑳᑦ ᐱᓇᓱᐊᕐᕕᒋᑦᓯᐊᕈᓐᓇᕐᓂᐊᓕᖅᑕᖓ 100% ᑖᑦᓱᒥᖓ ᐱᖕᒪᕆᐅᔪᒥᒃ ᐱᓕᕆᐊᒃᓴᒥᒃ ᐊᒻᒪᓗ ᐃᑲᔪᕐᓗᓂ ᖃᐅᔨᓴᕐᓂᕐᒧᑦ ᐃᓂᒃᓴᐅᔪᓂᒃ ᐱᑕᖃᕆᐊᓕᓐᓂᒃ ᑲᔪᓯᑦᓯᐊᕈᓐᓇᖁᓪᓗᒍ ᐱᓕᕆᐊᖑᔪᖅ ᑕᓪᓕᒪᓂ ᐊᕐᕌᒎᓂᐊᖅᑐᓂ”.
“ᖁᕕᐊᒋᔭᒻᒪᕆᒐ ᑲᔪᓯᔪᓐᓇᕐᓂᐊᓕᕋᒪ ᐃᑲᔪᕐᓗᒋᑦ ᓄᓇᓖᑦ ᓄᓇᕗᒻᒥ ᖃᐅᔨᔪᒪᑎᓪᓗᒋᑦ ᐃᖃᓗᓕᕆᓂᕐᒧᑦ ᐱᕙᓪᓕᐊᓂᖃᕈᓐᓇᕐᒪᖔᑕ ᐃᑲᔫᑎᓂᐊᖅᑐᒥᒃ ᓂᕆᔭᒃᓴᖃᑦᓯᐊᓂᕐᒧᑦ ᐊᒻᒪᓗ/ᐅᕝᕙᓘᓐᓃᑦ ᑮᓇᐅᔭᓕᐅᕋᓱᐊᕐᓂᕐᒧᑦ ᐱᕙᓪᓕᐊᑎᑦᓯᓂᕐᒥᒃ”, ᐅᖃᖅᑐᖅ ᑖᒃᑕ ᒍᕌᓐᑦ, “ᐱᓇᓱᐊᕋᑦᓴᕆᔭᕗᑦ ᐃᑲᔪᕐᓗᒋᑦ ᓄᓇᓖᑦ ᑲᑎᖅᓱᐃᑎᓪᓗᒋᑦ ᖃᐅᔨᓴᕈᑎᒥᓂᕐᓂᒃ ᐊᑐᖅᑕᐅᒋᐊᓕᓐᓂᒃ ᖃᐅᔨᓴᕐᓂᖏᓐᓂ ᐱᕙᓪᓕᐊᑎᑦᓯᒍᑎᒃᓴᖏᓐᓂᒃ, ᐱᓗᐊᖅᑐᒥ ᐊᑐᕐᓂᕐᒥᒃ ᓄᓇᓖᑦ ᐅᒥᐊᖏᓐᓂᒃ ᐊᒻᒪᓗ ᐃᖅᑲᓇᐃᔭᖅᑎᓂᒃ. ᒪᓂᒪᑎᑕᕗᑦ ᐱᓕᕆᐊᕆᖃᑦᑕᖅᓯᒪᒐᑦᑎᒍ ᖃᐅᔨᒪᓂᕗᑦ ᓴᖅᑭᐸᓪᓕᐊᔪᓂ ᐃᖃᓗᓕᕆᓂᕐᒧᑦ ᖃᐅᔨᓴᕐᓂᕐᒥᒃ ᐊᒻᒪᓗ ᐱᕙᓪᓕᐊᑎᑦᓯᓂᕐᒥᒃ ᑖᒃᑯᓇᓂ ᓄᓇᓕᓐᓂ ᐃᑲᔫᑎᒋᓂᐊᕋᑦᑎᒍ ᑐᑭᒧᐊᒍᑎᒃᓴᖏᓐᓄᑦ ᐊᐅᓚᑦᓯᔾᔪᑎᒃᑰᕆᐊᖃᕐᓂᕐᒥᒃ, ᐊᑐᕐᓗᒋᑦ ᐱᔪᒪᔭᖏᑦ ᐃᓱᒪᓕᐅᕈᑎᖏᓪᓗ ᓄᓇᓖᑦ ᓇᖕᒥᓂᖅ.”
QC ᐃᖃᓗᓕᕆᔨᒃᑯᖏᑕ ᒥᑦᓵᓄᑦ:
QC ᐃᖃᓗᓕᕆᔨᒃᑯᖏᑦ ᐊᐅᓚᑦᓯᔨᐅᔪᑦ ᑕᒪᐃᓐᓂᒃ ᐃᖃᓗᓕᕆᓂᕐᒧᑦ ᑕᕆᐅᓕᕆᓂᕐᒧᓪᓗ ᐊᐅᓚᑕᐅᔪᓂᒃ QC ᑲᒻᐸᓂᖁᑎᖏᓐᓂ. ᐊᐅᓚᑦᓯᔪᒍᑦ ᑐᓂᐅᖅᑲᐃᖃᑦᑕᖅᓱᑕᓗ QC ᐃᖃᓗᒐᓱᓐᓂᕐᒧᑦ ᑰᑕᖏᓐᓂᒃ ᐊᒻᒪᓗ ᐃᓚᖓᓂᒃ ᐅᓈᖅ ᑰᑕᖏᓐᓂᒃ, ᐊᒻᒪᓗ ᐃᖃᓗᒐᓱᓐᓂᕐᒧᑦ ᑐᓂᔭᐅᓯᒪᔪᓂᒃ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑕ ᐊᑐᐃᓐᓇᖃᕐᓂᕐᒧᑦ ᑐᓂᐅᖅᑲᐃᓂᕐᒧᓪᓗ ᐊᐅᓚᑦᓯᔾᔪᑎᖏᑎᒍᑦ.
QC-ᑯᑦ ᐃᖃᓗᓕᕆᔨᖏᑦ ᑐᓂᓯᒪᔪᑦ ᐃᑲᔪᕐᓂᕐᒧᑦ ᓄᓇᕗᒻᒥ ᐃᖃᓗᓕᕆᔨᓂᒃ. ᐱᓕᕆᕝᕕᒃ ᑭᒡᒐᖅᑐᐃᔪᖅ ᑲᒻᐸᓂᒥᒃ ᐊᔾᔨᒌᙱᑦᑐᓂ ᐃᖃᓗᓕᕆᓂᕐᒨᖓᔪᓂᒃ ᑲᑎᒪᔨᓂᒃ, ᑎᒥᐅᔪᓂᒃ ᐊᒻᒪᓗ ᑲᑐᔾᔨᖃᑎᒌᓂᒃ. ᐊᔭᐅᖅᑑᑎᒋᔭᕗᑦ ᐊᔾᔨᒌᑎᑦᓯᔪᒥᒃ ᓇᓕᒧᒌᑎᑦᓯᔪᒥᓪᓗ ᑐᓂᐅᖅᑲᐃᖃᑦᑕᓂᕐᒥᒃ ᐊᒻᒪᓗ ᐅᑎᖅᑎᑦᓯᖃᑦᑕᓂᕐᒥᒃ ᑰᑕᓂᒃ ᓄᓇᕗᒻᒧᑦ ᐊᑦᑐᐊᔪᓂ ᐃᒪᖏᓐᓂ.
ᑐᑦᑕᕐᕕᒃ ᒪᑭᒪᒍᓐᓇᖅᑐᒥᒃ ᑕᕆᐅᕐᒥ ᐊᑐᕋᑦᓴᓂᒃ (CSAR) ᒥᑦᓵᓄᑦ, ᐃᖃᓗᓕᕆᓂᕐᒧᑦ ᑕᕆᐅᓕᕆᓂᕐᒧᓪᓗ ᑎᒥᐅᔪᖅ ᒥᒨᕆᐅ ᐃᓕᓐᓂᐊᕕᔾᔪᐊᖓᓂ:
ᑐᑦᑕᕐᕕᒃ ᒪᑭᒪᒍᓐᓇᖅᑐᒥᒃ ᑕᕆᐅᕐᒥ ᐊᑐᕋᑦᓴᓂᒃ (CSAR), ᑕᕝᕙᓃᑦᑐᖅ ᐃᓕᓐᓂᐊᕐᕕᒃ ᐃᖃᓗᓕᕆᓂᕐᒧᑦ ᑕᕆᐅᓕᕆᓂᕐᒧᑦ ᑎᒥᖓᓂ, ᐱᓇᓱᐊᒐᖃᖃᑦᑕᓲᖅ ᖃᐅᔨᓴᕐᓂᕐᒥᒃ ᐱᕙᓪᓕᐊᑎᑦᓯᓂᕐᒥᓪᓗ, ᐃᓱᕐᕆᐅᑎᓕᕆᓂᕐᒥᒃ ᓄᒃᑎᕆᓂᕐᒥᒃ ᐊᒻᒪᓗ ᐃᓕᓐᓂᐊᕈᑎᓂᒃ ᓄᓇᕐᔪᐊᒥ ᐃᖃᓗᓕᕆᔨᓄᑦ (www.mi.mun.ca/csar).
CSAR−ᑯᓐᓂ ᐃᓕᓐᓂᐊᕐᓂᖅ, ᐱᓕᖕᒪᓴᕐᓂᖅ ᐊᒻᒪᓗ ᖃᐅᔨᓴᕐᓂᕐᒧᑦ ᐱᓕᕆᐊᖑᖃᑕᐅᔪᑦ ᓄᖑᐊᑎᑦᑎᑦᑕᐃᓕᓂᕐᒧᑦ ᐋᖅᑮᓯᒪᓂᖅ, ᐃᖃᓗᒐᓲᑏᑦ ᓴᓇᒻᒪᖏᑦ ᖃᐅᔨᓴᖅᑕᐅᓂᖏᓪᓗ, ᐊᒻᒪᓗ ᐃᖃᓗᓕᕆᓂᕐᒧᑦ ᖃᐅᔨᓴᕐᓂᖅ ᓴᖅᑭᐸᓪᓕᐊᔪᓂᒃ ᐆᒪᔪᓂᒃ. ᑐᑦᑕᕐᕕᒃ ᐊᐅᓚᑦᓯᔪᖅ ᓄᓇᕐᔪᐊᓕᒫᒥ ᐊᖏᓂᖅᐹᒥᒃ ᖃᐅᔨᓴᕐᕕᒻᒥᒃ ᐃᒪᓕᒻᒥᒃ (22 ᒦᑕ) ᑐᕌᖓᑎᑕᐅᔪᒥᒃ ᐃᒪᕐᒥᐅᑕᐃᑦ ᐊᐅᓚᓂᕆᓲᖏᓐᓂᒃ ᖃᐅᔨᓴᕐᓂᕐᒥᒃ, ᐱᓗᐊᖅᑐᒥ ᐊᖑᓇᓱᑦᑎᓄᑦ ᐊᒻᒪᓗ ᑕᕆᐅᕐᒥ ᐃᓱᕐᕆᐅᑎᓕᕆᕙᑦᑐᓄᑦ.
