ᕿᑭᖅᑖᓗᒃ ᑯᐊᐳᕇᓴᒃᑯᑦ ᑐᓴᖅᑎᑦᓯᔪᑦ ᐱᓕᕆᖃᑎᖃᕐᓂᐊᓂᕐᒥᓂᒃ ᓯᕗᓂᑦᑎᓐᓂ ᐊᔪᕈᓐᓃᖅᓴᕕᑦᓴᒥᒃ ᐃᑲᔫᑎᒥᒃ ᓄᓇᐅᑉ ᖃᓂᒋᔮᓂ ᐃᖃᓗᓕᕆᓂᕐᒥᒃ ᐱᕙᓪᓕᐊᑎᑦᓯᓂᕐᒧᑦ ᕿᑭᖅᑕᓂ ᓄᓇᖓᓂ ᓄᓇᕗᒻᒥ
ᐃᖃᓗᐃᑦ, ᓄᓇᕗᑦ ᓅᕕᒻᐱᕆ 30, 2022
ᕿᑭᖅᑖᓗᒃ ᑯᐊᐳᕇᓴᒃᑯᑦ (QC) ᖁᕕᐊᓱᑦᑐᑦ ᑐᓴᖅᑎᑦᓯᒋᐊᑦᓴᖅ ᐊᖏᖃᑎᖃᕐᓂᕐᒥᒃ ᐱᓕᕆᖃᑎᖃᕐᓂᐊᓂᕐᒥᒃ ᓯᕗᓂᑦᑎᓐᓂ ᐊᔪᕈᓐᓃᓴᕐᕕᑦᓴᒥᒃ (FSC) ᐱᓕᕆᐊᒥᓄᑦ ᑕᐃᒎᓯᓕᒻᒧᑦ: ᓄᓇᐅᑉ ᖃᓂᒋᔮᓂ ᐃᖃᓗᓕᕆᓂᕐᒥᒃ ᐱᕙᓪᓕᐊᑎᑦᓯᓂᕐᒧᑦ ᕿᑭᖅᑕᓂ ᓄᓇᖓᓂ ᓄᓇᕗᒻᒥ. ᑖᓐᓇ $1-ᒥᓕᔭᕌᖅᑐᖅ ᐊᖏᕈᑕᐅᔪᖅ ᐃᑲᔫᑎᖃᕐᓂᐊᖅᑐᖅ ᐊᔪᕈᓐᓃᖅᓴᐅᑎᑦᓴᓄᑦ ᐱᕙᓪᓕᐊᑎᑦᓯᓂᕐᒥᒃ ᐅᑭᐅᖅᑕᖅᑐᖓᓂ ᑲᓇᑕ.
“QC-ᑯᑦ ᖁᕕᐊᓱᑦᑐᑦ ᐊᖏᖃᑎᖃᕐᓂᕐᒥᒃ ᐱᓕᕆᖃᑎᖃᕐᓂᐊᓂᕐᒥᒃ ᓯᕗᓂᑦᑎᓐᓂ ᐊᔪᕈᓐᓃᓴᕐᕕᒃᓴᒥᒃ ᑖᒃᑯᓄᖓ ᐊᔪᕈᓐᓃᖅᓴᐅᑎᓄᑦ ᐱᕙᓪᓕᐊᑎᑦᓯᓂᕐᒥᒃ ᐊᑦᑐᐊᔪᒥᒃ ᓄᓇᐅᑉ ᖃᓂᒋᔮᓂ ᐃᖃᓗᓕᕆᓂᕐᒧᑦ ᐱᕙᓪᓕᐊᑎᑦᓯᓂᕐᒥᒃ ᐃᓚᒋᔭᐅᔪᖁᑎᑦᑎᓐᓄᑦ ᓄᓇᓕᓐᓄᑦ ᕿᑭᖅᑕᓂ ᓄᓇᖓᓂ,” ᐅᖃᖅᑐᖅ ᐲᑕ ᑮᓇᐃᓐᓇᖅ, ᐊᖓᔪᖅᑳᑉ−ᑐᒡᓕᐊ − ᐃᖃᓗᓕᕆᔨᖏᓐᓄᑦ QC−ᑯᑦ. “ᑕᒪᓐᓇ ᐃᑲᔫᑎᓂᐊᖅᑐᖅ ᑐᕌᖓᔪᒥᒃ ᐱᕙᓪᓕᐊᑎᑦᓯᓂᕐᒧᑦ ᐊᐅᓚᑦᓯᔾᔪᑎᒃᓴᓂᒃ ᐊᒻᒪᓗ ᓇᖕᒥᓂᖁᑎᖃᓂᒃᑯᑦ ᐊᔪᕈᓐᓃᖅᓴᐅᑎᒃᓴᓂᒃ ᓄᓇᓕᓐᓂ ᐃᓄᐃᑦ ᐃᑲᔪᖅᑕᐅᖁᓪᓗᒋᑦ ᓯᕗᓕᕈᓐᓇᖁᓪᓗᒋᑦ ᐱᕙᓪᓕᐊᑎᑦᓯᓂᕐᒥᒃ ᓄᓇᐅᑉ ᖃᓂᒋᔮᓂ ᐃᖃᓗᓕᕆᓂᕐᒧᑦ ᓄᓇᒥᓐᓂ.”
ᐲᑦᕈ ᕙᕌᑕ, ᐊᐅᓚᑦᓯᔨᒻᒪᕆᖓ ᓯᕗᓂᑦᑎᓐᓂ ᐊᔪᕈᓐᓃᓴᕐᕕᒃᓴᖅ, ᐅᖃᖅᑐᖅ ᑖᓐᓇ ᐱᓕᕆᖃᑎᒌᒍᑎ ᐆᑦᑐᕋᐅᑎᑦᓯᐊᕙᒻᒪᕆᒃ ᖃᓄᖅ FSC ᐱᓕᕆᖃᑎᖃᕈᓐᓇᕐᓂᖓᓂᒃ ᒪᑭᑉᐸᓪᓕᐊᑎᑦᓯᓂᕐᒧᑦ ᐱᕙᓪᓕᐊᔾᔪᑎᒃᓴᓂᒃ ᐊᒻᒪᓗ ᑲᓱᕈᑕᐅᓗᓂ ᓯᕗᓂᕐᒥ ᐊᔪᕈᓐᓃᖅᓴᐅᑎᒃᓴᓄᑦ ᐊᐳᖅᓯᒪᕕᐅᒐᔭᖅᑐᓄᑦ. “ᑲᒪᒋᒋᐊᖓ ᐊᔾᔨᐅᖏᑦᑐᒥᒃ ᐊᑐᖅᑕᐅᒋᐊᓕᓐᓂᒃ ᐊᒻᒪᓗ ᐊᐳᖅᓯᒪᕕᖕᓂᒃ ᐃᖅᑲᓇᐃᔮᒧᑦ ᓵᙵᔭᐅᒋᐊᖃᖃᑦᑕᖅᑐᒥᒃ ᐅᑭᐅᖅᑕᖅᑐᒥ ᐊᒻᒪᓗ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓄᑦ ᐊᒻᒪᓗ ᓇᓕᖅᑯᑦᓯᓂᖅ ᐃᖃᓗᓕᕆᔨᓄᑦ ᑲᔪᓯᑎᑕᐅᒻᒪᐃᑦᑐᓂ ᐱᔪᒪᔭᐅᔪᓂᒃ ᐊᔪᙱᔾᔪᑎᓕᓐᓂᒃ ᐃᖅᑲᓇᐃᔭᖅᑎᓂᒃ ᓴᖅᑮᓂᐊᖅᑐᖅ ᑐᑭᒧᐊᒍᑎᑦᓴᑦᓯᐊᕙᒻᒥᒃ ᐃᖅᑲᓇᐃᔮᖃᕐᓂᕐᒥᒃ ᐊᒻᒪᓗ ᐊᔪᕈᓐᓃᖅᓴᐅᑎᒃᓴᓄᑦ ᐱᓕᖕᒪᒃᓴᐅᑎᓂᒃ ᐊᒻᒪᓗ ᐊᑐᐃᓐᓇᖃᕐᓂᕐᒥᒃ ᐊᖏᔪᒻᒪᕆᐅᔪᒥᒃ ᐊᑦᑐᖅᑕᐅᓯᒪᙱᑦᑐᓂᒃ ᐃᑲᔫᑎᒃᓴᓂᒃ ᐃᖅᑲᓇᐃᔮᓂᒃ,” ᐅᖃᖅᑐᖅ ᕙᕌᑕ.
FSC ᐃᑲᔪᖅᓱᐃᔪᖅ ᐅᑭᐅᖅᑕᖅᑐᒥ−ᓯᕗᓕᖅᑕᐅᔪᓂᒃ ᐃᓱᒪᑦᓴᖅᓯᐅᕈᑎᒃᓴᓂᒃ ᐊᒻᒪᓗ ᓄᑖᓂᒃ ᓴᖅᑭᐸᓪᓕᐊᔪᓂᒃ ᐃᑲᔫᑎᓕᓐᓂᒃ ᐱᕙᓪᓕᐊᑎᑦᓯᒍᑎᒃᓴᓂᒃ ᐊᐅᓚᔾᔪᑕᐅᔪᓄᑦ ᐱᖁᑎᕐᔪᐊᓄᑦ ᐊᑯᓂ ᐊᑐᖅᑕᐅᔪᓐᓇᓂᐊᖅᑐᓂᒃ ᐊᔪᕈᓐᓃᖅᓴᐅᑎᒃᓴᓂᒃ ᐱᕙᓪᓕᐊᑎᑦᓯᓂᕐᒧᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ, ᐊᒻᒪᓗ ᐱᓕᕆᖃᑕᐅᔪᓂᒃ ᐃᑲᔫᑎᓕᓐᓂᒃ ᓴᕐᖓᑎᑦᓯᑲᓐᓂᕈᑎᒃᓴᓂᒃ ᒥᑭᔫᑎᓂᒃ− ᐊᒻᒪᓗ ᐊᑯᓐᓛᕿᔪᓂᒃ− ᓇᖕᒥᓂᖁᑕᐅᔪᓂᒃ ᐊᒻᒪᓗ ᓇᖕᒥᓂᖁᑎᓕᓐᓂᒃ.
ᐊᕐᕌᒎᓂᐊᖅᑐᓂ ᐊᒥᓱᒐᓚᓐᓂ, QC−ᑯᑦ ᐋᖅᑭᑦᓯᒪᒍᑎᒃᓴᓯᐅᖅᑐᑦ ᐃᖅᑲᓇᐃᔭᖅᑎᒋᔭᐅᒋᐊᓕᖕᓂᒃ ᑲᔪᓯᐊᑦᓯᐊᖅᑐᒥᒃ ᓄᓇᐅᑉ ᖃᓂᒋᔮᓂ ᐃᖃᓗᓕᕆᓂᕐᒧᑦ ᖃᐅᔨᓴᕐᓂᕐᒧᑦ ᐱᕙᓪᓕᐊᑎᑦᓯᓂᕐᒧᓪᓗ ᕿᑭᖅᑕᓂ ᓄᓇᖓᓂ. ᐱᓕᕆᐊᖑᓗᓂ ᐃᓘᓐᓈᒍᑦ ᐅᑯᑎᒎᓇ: ᐱᔪᒐᖅᓴᐃᓂᒃᑯᑦ ᑲᑦᓱᖓᐃᓕᖅᑎᑦᓯᒍᑎᒃᓴᓂᒃ ᒪᒃᑯᑦᑐᓂᒃ ᐃᓄᓐᓂᒃ ᐱᕝᕕᒃᓴᖃᖅᑎᑕᐅᓂᒃᑯᑦ ᐱᓕᕆᐊᖑᔪᓂᒃ ᖃᐅᔨᓴᕐᓂᕐᒧᑦ, ᐅᒥᐊᕐᔪᐊᒥ ᐊᐅᓚᑦᓯᓂᕐᒧᑦ, ᐅᑭᐅᒃᑯᑦ ᐊᐅᔭᒃᑯᓪᓗ ᐃᖃᓗᒐᓱᓐᓂᖅ, ᐊᒻᒪᓗ ᓄᓇᐅᑉ ᖃᓂᒋᔮᓂ ᐃᖃᓗᓕᕆᓂᕐᒥᒃ ᐊᐅᓚᑦᓯᓂᖅ ᐊᒻᒪᓗ ᐃᖃᓗᓕᕆᕕᓕᕆᓂᖅ; ᓇᓗᓇᐃᖅᑐᐃᓂᖅ ᐃᑲᔪᖅᓱᐃᓂᕐᓗ ᐱᕙᓪᓕᐊᑎᑕᐅᒍᑎᒃᓴᖏᓐᓂᒃ ᓇᖕᒥᓂᖁᑎᑖᖅᐸᓪᓕᐊᓂᕐᒧᑦ, ᒥᑭᔫᑎᓂᒃ ᓇᖕᒥᓂᖁᑎᖃᕐᓂᖅ, ᐊᒻᒪᓗ ᐊᐅᓚᑦᓯᔨᓂᒃ ᑎᒍᒥᐊᖅᑐᒃᓴᓂᒃ ᑲᔪᓯᑦᓯᐊᖅᓯᒪᓂᕐᒥᓄᑦ.
ᔨᐅᕆ ᕗᐊᑦ, ᑐᑭᒧᐊᒃᑎᑦᑎᔨᖓ QC-ᑯᓐᓂ ᐃᖃᓗᓕᕆᔨᒃᑯᑦ ᐅᖃᓚᐅᖅᑐᖅ: “ᐱᒋᐊᕈᑎᓄᑦ ᐸᕐᓇᐅᑏᑦ ᐱᒋᐊᕈᑎᒃᓴᑦ ᐆᑦᑐᕋᐅᑎᓄᑦ ᒪᕐᕉᓐᓄᑦ ᓄᓇᓖᓐᓄᑦ ᐊᕐᕌᒍ 1 ᐊᒻᒪᓗ ᐊᖏᓕᕙᓪᓕᐊᑎᓪᓗᒍ ᐱᓕᕆᐊᖅ ᑎᑭᐅᑎᓗᓂ ᑕᒪᐃᓐᓄᑦ 13- ᓄᑦ ᕿᑭᖅᑕᓂ ᓄᓇᓕᖏᓐᓄᑦ. ᓂᕆᐅᒋᔭᐅᔪᖅ ᑖᓐᓇ ᐱᓕᕆᐊᖅ ᓯᕗᓕᕐᓂᐊᕐᓂᖓᓂᒃ ᓄᑖᒥᒃ ᓴᖅᑭᐸᓪᓕᐊᔪᒥᒃ ᐊᐅᓚᑕᐅᓂᖓᓂᒃ ᓄᓇᖃᖅᑳᖅᓯᒪᔪᑦ ᓄᓇᓕᑦᑎᒍᑦ ᓇᖕᒥᓂᖁᑎᑖᖅᐸᓪᓕᐊᓂᖏᓐᓂᒃ ᐊᒻᒪᓗ ᒥᑭᔫᑎᓂᒃ
ᓇᖕᒥᓂᖁᑎᓖᑦ ᐊᖏᓕᕙᓪᓕᐊᒍᑎᒃᓴᖏᓐᓂᒃ ᐊᕐᕌᒍᓂ ᐊᓂᒍᖅᐸᓪᓕᐊᔪᓂ QC−ᑯᑦ ᐊᓯᖏᓐᓄᑦ ᓄᓇᓕᖁᑎᖏᓐᓄᑦ ᐊᒻᒪᓗ ᐊᕙᖕᒧᐸᓪᓕᐊᓗᓂ ᐊᓯᖏᓐᓄᑦ ᐊᕕᑦᑐᖅᓯᒪᓂᕐᓄᑦ ᐊᒻᒪᓗ ᐊᓯᖏᓐᓄᑦ ᐱᓕᕆᕕᒋᔭᐅᔪᓄᑦ ᐅᑭᐅᖅᑕᖅᑐᒥ ᒪᑭᒪᔾᔪᑎᓄᑦ”.
QC−ᑯᓐᓂ ᐃᖃᓗᓕᕆᔨᒃᑯᑦ ᐱᓕᕆᕝᕕᐊᑕ ᒥᑦᓵᓄᑦ:
QC ᐃᖃᓗᓕᕆᔨᒃᑯᖏᑦ ᐊᐅᓚᑦᓯᔨᐅᔪᑦ ᑕᒪᐃᓐᓂᒃ ᐃᖃᓗᓕᕆᓂᕐᒧᑦ ᑕᕆᐅᓕᕆᓂᕐᒧᓪᓗ ᐊᐅᓚᑕᐅᔪᓂᒃ QC ᑲᒻᐸᓂᖁᑎᖏᓐᓂ. ᐊᐅᓚᑦᓯᔪᒍᑦ ᑐᓂᐅᖅᑲᐃᖃᑦᑕᖅᓱᑕᓗ QC ᐃᖃᓗᒐᓱᓐᓂᕐᒧᑦ ᑰᑕᖏᓐᓂᒃ ᐊᒻᒪᓗ ᐃᓚᖓᓂᒃ ᐅᓈᖅ ᑰᑕᖏᓐᓂᒃ, ᐊᒻᒪᓗ ᐃᖃᓗᒐᓱᓐᓂᕐᒧᑦ ᑐᓂᔭᐅᓯᒪᔪᓂᒃ ᓄᓇᕗᒻᒥ ᐆᒪᔪᓕᕆᔨᕐᔪᐊᒃᑯᑦ ᑲᑎᒪᔨᖏᑕ ᐊᑐᐃᓐᓇᖃᕐᓂᕐᒧᑦ ᑐᓂᐅᖅᑲᐃᓂᕐᒧᓪᓗ ᐊᐅᓚᑦᓯᔾᔪᑎᖏᑎᒍᑦ.
QC-ᑯᑦ ᐃᖃᓗᓕᕆᔨᖏᑦ ᑐᓂᓯᒪᔪᑦ ᐃᑲᔪᕐᓂᕐᒧᑦ ᓄᓇᕗᒻᒥ ᐃᖃᓗᓕᕆᔨᓂᒃ. ᐱᓕᕆᕝᕕᒃ ᑭᒡᒐᖅᑐᐃᔪᖅ ᑲᒻᐸᓂᒥᒃ ᐊᔾᔨᒌᙱᑦᑐᓂ ᐃᖃᓗᓕᕆᓂᕐᒨᖓᔪᓂᒃ ᑲᑎᒪᔨᓂᒃ, ᑎᒥᐅᔪᓂᒃ ᐊᒻᒪᓗ ᑲᑐᔾᔨᖃᑎᒌᓂᒃ. ᐊᔭᐅᖅᑑᑎᒋᔭᕗᑦ ᐊᔾᔨᒌᑎᑦᓯᔪᒥᒃ ᓇᓕᒧᒌᑎᑦᓯᔪᒥᓪᓗ ᑐᓂᐅᖅᑲᐃᖃᑦᑕᓂᕐᒥᒃ ᐊᒻᒪᓗ ᐅᑎᖅᑎᑦᓯᖃᑦᑕᓂᕐᒥᒃ ᑰᑕᓂᒃ ᓄᓇᕗᒻᒧᑦ ᐊᑦᑐᐊᔪᓂ ᐃᒪᖏᓐᓂ.
ᓯᕗᓂᑦᑎᓐᓂ ᐊᔪᕈᓐᓃᖅᓴᕐᕕᒃᓴᐅᑉ ᒥᑦᓵᓄᑦ:
ᑖᓐᓇ ᓯᕗᓂᑦᑎᓐᓂ ᐊᔪᕈᓐᓃᓴᕐᕕᒃᓴᖅ (FSC) ᑲᓇᑕᓕᒫᒥ ᐱᓇᓱᐊᒐᐅᔪᖅ ᑐᕌᖓᔪᖅ ᐃᑲᔪᖅᑕᐅᔾᔪᑎᒃᓴᖏᓐᓄᑦ ᑲᓇᑕᒥᐅᑦ ᑎᒍᓯᓂᕐᒥᒃ ᐊᔪᙱᔾᔪᑎᖃᕈᑕᐅᒋᐊᓕᓐᓂᒃ ᒪᑭᑉᐸᓪᓕᐊᒍᑎᒃᓴᓂᒃ ᐊᓯᔾᔨᐸᓪᓕᐊᓂᖏᓐᓄᑦ ᐃᖅᑲᓇᐃᔮᑦᓴᑦ. FSC ᑮᓇᐅᔭᓕᑕᐅᓯᒪᔪᖅ ᑲᓇᑕ ᒐᕙᒪᒃᑯᑦ ᓯᕗᓂᑦᑎᓐᓂ ᐊᔪᕈᓐᓃᖅᓴᐅᑎᒃᓴᑦ.
ᑐᑭᓯᒋᐊᒃᑲᓂᕐᕕᒃᓴᑦ ᖃᐅᔨᒋᐊᕐᕕᒋᓗᒋᑦ:
ᐲᑕ ᑮᓇᐃᓐᓇᖅ
ᐊᖓᔪᖅᑳᑉ−ᑐᒡᓕᐊ ᐃᖃᓗᓕᕆᔨᒃᑯᑦ
ᐅᖄᓚᐅᑖ: 867 979 8400
PKeenainak@qcorp.ca
ᔨᐅᕆ ᕗᐊᑦ
ᐃᖃᓗᓕᕆᔨᒃᑯᓐᓂ ᑐᑭᒧᐊᒃᑎᑦᑎᔨ
ᐅᖄᓚᐅᑖ: 867 979 8400
JWard@qcorp.ca
ᐃᒡᓚᓐᑕᐃᓐ ᕌᕚᑦ
ᑐᓴᐅᒪᔾᔪᑎᓕᕆᓂᕐᒧᑦ ᐊᐅᓚᑦᓯᔨ
647-262-3706
communications@fsc-ccf.ca
