ᖃᐅᔨᓴᕐᓂᖅ ᐱᒋᐊᖅᑎᑕᐅᓯᒪᔪᖅ ᒥᑭᔫᑎᓂᒃ ᓴᓇᖃᑦᑕᕐᓂᖅ

ᐃᑲᔪᖅᓯᖅᑕᐅᓪᓗᑎᒃ ᑲᓇᑕᒥ ᖃᐅᔨᓴᕐᓂᕐᒧᑦ ᑲᑎᒪᔨᖏᓐᓄᑦ, ᕿᑭᖅᑖᓗᒃ ᓇᒻᒥᓂᖁᑎᓕᓐᓄᑦ ᐱᕙᓪᓕᐊᑎᑦᑎᓂᕐᒧᑦ ᑯᐊᐳᕇᓴᓐᖓ ᑲᑐᔾᔨᖃᑎᖃᖅᑐᑎᒃ ᓅᕙᒃᑯᓐᓂᑦ ᓴᓇᓯᒪᔪᑦ ᖃᐅᔨᓴᖅᑕᐅᓂᐊᖅᑐᒥᒃ ᐃᓪᓗᒥᒃ ᐅᖅᑰᔪᓐᓇᕐᓂᖓ ᖃᓄᐃᒻᒪᖔᖅ ᑲᑎᑎᒐᖅ ᐃᓪᓗᒃᓴᖅ. ᖄᖓᒍᒃᑲᓐᓂᖅ ᖃᐅᔨᓴᖅᑕᐅᑐᐃᓐᓇᕆᐊᖃᕐᒥᔪᖅ ᐆᒻᒪᖅᑯᑎᓂᒃ ᐊᔾᔨᒌᓐᖏᑦᑐᓂᒃ ᐆᑦᑐᕋᕐᓗᑎᒃ, ᖃᐅᔨᒐᓱᐊᖅᑎᓪᓗᑕ ᐋᖅᑭᒍᑎᒃᓴᐅᔪᓂᒃ ᐊᑭᑐᓗᐊᓐᖏᑦᑐᓂᒃ ᐃᓪᓗᖃᖅᑎᑦᑎᒍᑎᒃᓴᓂᑦ ᓇᒻᒥᓂᕆᔭᐅᒐᔭᖅᑐᓂᒃ, ᑕᕝᕙᓴᐃᓐᓇᕐᓗ ᖃᓄᖅ ᐊᐅᓚᑕᐅᒐᔭᕐᒪᖔᖅ ᓄᓇᓕᓐᓂ ᒥᑭᔫᑎᓂᒃ ᓴᓇᕕᒃ ᖃᐅᔨᓴᖅᑐᑎᒃ.

ᖁᔭᓕᒍᒪᒻᒥᔭᕗᑦ ᐃᓕᐅᖅᑲᐃᖃᑕᐅᓯᒪᔪᑦ ᑐᕋᐃᑎᒃᑯᑦ ᐊᒻᒪᓗ ᐅᑭᐅᖅᑕᖅᑐᒥ ᐃᒐᓛᓕᕆᔩᑦ ᒪᑐᓕᕆᔩᓪᓗ ᐃᒐᓛᖃᖅᕕᓐᓂᑦ ᐃᒐᓛᕐᓂᓪᓗ, ᒪᑐᓂᓪᓗ ᐱᑎᑦᑎᓚᐅᕐᒪᑎᒃ ᐱᓕᕆᐊᑦᑎᓐᓄᑦ ᐃᑲᔫᑎᒋᓂᐊᖅᑕᒥᓂᒃ.

ᑖᔅᓱᒪ ᖃᐅᔨᓴᖅᐸᓪᓕᐊᓂᐅᑉ ᓯᕗᓪᓕᖅᐹᖓ ᐱᒋᐊᖅᑎᓛᕋᑦᑎᒍ ᒫᑦᓯ 31, 2017−ᒥ, ᐊᒻᒪᓗ ᓂᕆᐅᑦᑎᐊᖅᐳᒍᑦ ᐊᖅᑯᓯᐅᕐᓂᐊᓕᖅᑐᒋᓪᓗᑕ ᑐᕌᕐᓗᑕ ᓴᖅᑭᔮᖅᑎᑦᑎᔪᓐᓇᓂᕐᒧᑦ ᑕᒫᓂᒥᐅᑕᐃᑦ ᓴᓇᑎᖃᑦᑕᕐᓗᑎᒃ ᐋᖅᑮᕚᓪᓕᕈᑎᐅᒐᓱᐊᕐᓗᓂ ᐃᓪᓗᑭᔅᓱᕐᓂᐅᕙᑦᑐᓂᒃ ᐊᒻᒪᓗ ᑕᒫᓂ ᐱᕙᓪᓕᐊᔪᓕᕆᓂᕐᒥᒃ.