ᐃᖃᓗᓐᓂ ᑐᔪᕐᒥᕕᒃᓴᖅ ᑲᑎᒪᕐᔪᐊᕕᒃᓴᕐᓗ

ᕿᑭᖅᑖᓗᒃ ᑯᐊᐳᕇᓴᓐ ᓴᓇᔪᒪᒻᒪᑦ ᓯᕗᓪᓕᐹᑦᑎᐊᕐᒥᒃ ᐃᓄᓐᓄᑦ ᓇᒻᒥᓂᕆᔭᐅᔪᒥᒃ ᓈᒪᔪᒥᒃ ᑐᔪᕐᒥᕕᒻᒥᒃ ᑲᑎᒪᕐᔪᐊᕕᒃᓴᒥᓪᓗ ᓄᓇᕗᑦ ᐊᖏᔪᖅᑳᖃᖅᕕᖓᓂ ᐃᖃᓗᓐᓂ.  ᑕᒪᓐᓇᓗ ᐱᔾᔪᑎᐅᓪᓗᓂ, ᑖᓐᓇ ᐱᓕᕆᓂᐅᔪᖅ ᓴᖅᑭᔮᖅᑎᑦᑎᒐᔭᖅᐳᖅ ᑕᑯᒥᓇᒻᒪᕆᑦᑐᓂᒃ ᑭᒃᑯᓐᓄᑦ ᐱᒋᔭᐅᒻᒪᖔᖅ ᓇᓗᓇᐃᖅᓯᔾᔪᑎᓂᒃ.

ᑖᓐᓇ ᑐᔪᕐᒥᕕᒃ ᐃᓚᖃᕋᔭᖅᑐᖅ 96−ᓂᒃ ᐃᓪᓗᕈᓯᕐᓂᒃ ᓯᓂᑦᑕᕕᒃᓴᓂᑦ, 5000 ᐆᑦᑑᑎᓂᑦ ᑭᑉᐹᕆᑦᑐᓂᒃ ᐊᖏᓂᓕᒃ ᑲᑎᒪᕐᔪᐊᖅᕕᒃ, ᐃᒥᕆᐊᖅᑐᖅᕕᒃ, ᓂᕆᔭᖅᑐᖅᕕᒃ, ᑮᓇᐅᔭᓕᐅᕋᓱᐊᖅᑎᓄᑦ ᐃᓂᒃᓴᖅ, ᐃᖃᐃᓕᓴᖅᕕᒃ, ᐊᒻᒪᓗ ᐱᐅᓴᖅᑕᐅᕕᒃ ᐊᓯᖏᓪᓗ.

ᐅᑭᐅᖅᑕᖅᑑᑉ ᓯᕗᓂᕆᓂᐊᖅᑕᖓ ᐊᑐᖅᑕᐅᕙᓪᓕᐊᖏᓐᓇᑎᓪᓗᒍ ᓄᓇᒥᐅᑕᓂᑦ ᐆᒻᒪᖅᑯᑎᒃᓴᓂᓪᓗ ᕿᓂᖅᑎᐅᔪᓄᑦ ᓇᑭᕈᓘᔮᖅᑐᓄᑦ ᓯᓚᕐᔪᐊᕐᒥ, ᐱᒻᒪᕆᓪᓚᕆᐅᕗᖅ ᑕᒪᒃᑯᐊ ᓄᓇᕘᑉ ᐃᓄᖏᑦ ᑕᑯᒃᓴᐅᖃᑕᐅᒋᐊᖃᓪᓚᕆᓐᓂᖓ ᐊᒻᒪᓗ ᐅᒃᐱᕆᔭᖏᑦ ᓴᓐᖏᓈᕆᐊᖅᑕᐅᓯᒪᓗᑎᒃ.

ᑖᒃᓱᒪ ᐃᓪᓘᑉ ᑎᑎᕋᐅᔭᖅᑕᐅᓯᒪᓂᖓ ᒪᓕᒃᓴᖅᓯᒪᒋᐊᖃᖅᐳᖅ ᓴᖅᑭᔮᖅᑎᑦᑎᓗᓂᓗ ᐃᓕᖅᑯᓯᖏᓐᓂᑦ, ᐱᖅᑯᓯᖏᓐᓂᑦ, ᐅᑉᐱᕆᔭᖏᓐᓂᓪᓗ ᓄᓇᕗᒥ ᓄᓇᓕᓕᒫᑦᑎᐊᑦ. ᑖᒃᑯᐊ ᓄᑖᑦ ᐱᓕᕆᕖᑦ ᓴᖅᑭᔮᖅᑎᑦᑎᓂᐊᖅᐳᑦ ᐅᓪᓗᒥᐅᓕᖅᑐᖅ ᐃᓅᓕᖅᑐᓂᒃ ᐊᒻᒪᓗ ᓄᓇᕗᒥ ᐃᓅᖃᑎᒌᓐᓂᕐᒧᑦ ᒪᑭᒪᖃᑎᒌᓐᓂᒧᓪᓗ ᓯᕗᒧᑦ ᑕᑯᓐᓇᖑᐊᖅᑕᐅᔪᓂᒃ.