ᐅᓗᕆᐊᓇᖅᑐᓖᑦ ᓄᓇᒥᐅᑕᐃᑦ ᓴᓗᒻᒪᖅᓴᖅᑕᐅᓂᖏᓐᓄᑦ ᑳᓐᑐᕌᒃ ᑐᓐᓂᖅᑯᑕᐅᕗᖅ ᕿᑭᖅᑖᓗᖕᒥ ᐊᕙᑎᓕᕆᔨᒃᑯᓐᓄᑦ

Date: 
01 ᒫᔾᔨ 2012

ᕿᑭᖅᑖᓗᖕᒥ ᐊᕙᑎᓕᕆᔨᒃᑯᑦ, ᕿᑭᖅᑖᓗᒃ ᑯᐊᐳᕇᓴᒃᑯᓐᓄᑦ ᓇᖕᒥᓂᕆᔭᐅᖃᑕᐅᔪᖅ ᐊᒻᒪ ᓴᖅᑭᑕᐅᓯᒪᔪᖅ ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑎᑎᒍᑦ, ᑲᓇᑕᒥ ᐅᓇᑕᖅᑐᒃᓴᓕᕆᔨᒃᑯᓐᓄᑦ ᑳᓐᑐᕌᒃᑖᖅᑎᑕᐅᕗᑦ $15 ᒥᓕᐊᓐᑲᓴᖕᓂᒃ ᐊᑭᖃᓪᓗᐊᖅᑐᓂᒃ.  ᑖᒃᑯᐊ ᑳᓐᑐᕌᑦ ᐃᓗᓕᖃᖃᓯᐅᔾᔨᓯᒪᔪᑦ ᑕᕆᐅᒃᑯᑦ ᓄᒃᑕᐅᑎᓕᕆᓂᕐᒥᒃ, ᖃᓪᓗᓈᑦ ᓄᓇᖓᓐᓄᑦ ᐊᒡᔭᖅᑐᐃᓂᕐᒥᒃ ᐊᒻᒪ ᓱᕈᕐᓇᖅᑐᓕᖕᓂᒃ ᓄᓇᒥᐅᑕᓂᒃ, ᐅᓗᕆᐊᓇᖅᑐᓂᒃ ᐃᓗᓕᓕᖕᓂᒃ ᐊᒻᒪ ᐲᓰᐲᓕᖕᓂᒃ 14000 MT ᐅᖓᑖᓃᑦᑐᓂᒃ ᐊᒃᑕᖅᑐᐃᓂᕐᒥᒃ.  ᑕᒪᒃᑯᐊ ᓱᕈᕐᓇᖅᑐᓖᑦ ᐅᓗᕆᐊᓇᖅᑐᓕᓪᓗ ᑲᑎᖅᓱᖅᑕᐅᓂᐊᖅᑐᑦ ᓄᓇᕗᑦ ᐃᓗᐊᓂ ᓈᓚᐅᑎᖃᕐᕕᕕᓂᕐᓂᑦ 7 ᓴᓗᒻᒪᖅᓴᖅᑕᐅᕙ ᓪᓕᐊᓕᖅᐸᑕ.

ᓈᓚᐅᑎᖃᕐᕕᕕᓃᑦ  21-ᖑᔪᑦ ᓴᓗᒻᒪᖅᓴᖅᑕᐅᕙᓪᓕᐊᖏᓐᓇᖅᑐᑦ ᑲᓇᑕᒥ ᐅᓇᑕᖅᑐᒃᓴᓕᕆᔨᒃᑯᓐᓄᑦ ᑲᓇᑕᐅᑉ ᐅᑭᐅᖅᑕᖅᑐᓕᒫᖓᓂ.  ᑕᒪᓐᓇ ᓴᓗᒻᒪᖅᓴᐃᓂᖅ ᐱᔭᕇᖅᑕᐅᑲᓴᑦᑎᐊᓕᖅᑐᖅ, ᐊᒻᒪ ᒫᓐᓇ ᓴᓗᒻᒪᖅᓴᐃᕙ ᓪᓕᐊᓪᓗᑎᒃ ᒪᕐᕉᖕᓂᒃ ᓈᓚᐅᑎᖃᕐᕕᕕᓂᕐᓂᒃ ᓄᒡᓗᐃᑦ ᐊᒻᒪ ᐃᑦᑕᔭᕆᓕᒃ.

ᐅᒥᐊᕐᔪᐊᖃᕐᓇᐅᓂᖓᓂ 2012-2013-ᒥ ᑕᒪᓐᓇ ᓴᓗᒻᒪᖅᓴᐃᓂᖅ ᐊᑐᖅᑕᐅᓂᐊᖅᑐᖅ.  ᑖᒃᑯᓇᓐᖓᑦ 7-ᓂᑦ ᓈᓚᐅᑎᖃᕐᕕᕕᓂᕐᓂ ᐅᑯᓇᓂ ᑳᓐᑐᕌᒃ ᐃᓗᖃᓃᖃᑕᐅᔪᓂᑦ ᐅᓗᕆᐊᓇᖅᑐᖃᕐᓂᖅᐹᖑᔪᖅ ᐃᑦᑕᔭᕆᓕᒃ ᕿᑭᖅᑖᓗᖕᒦᑦᑐᖅ.  ᑖᓐᓇ ᓱᓕ ᓴᓗᒻᒪᖅᓴᖅᑕᐅᕙ ᓪᓕᐊᖏᓐᓇᖅᑐᖅ ᐊᒻᒪ ᕿᑭᖅᑖᓗᖕᒥ ᓱᓇᒃᑯᑖᓕᕆᔩᑦ, ᕿᑭᖅᑖᓗᒃ ᑯᐊᐳᕇᓴᒃᑯᓐᓄᑦ ᓇᖕᒥᓂᕆᔭᐅᖃᑕᐅᖕᒥᔪᖅ, ᑳᓐᑐᕌᒃᑎᓪᓗᐊᑕᕆᔭᐅᓂᐊᖅᑐᖅ.

ᑕᒪᓐᓇ ᐱᓕᕆᐊᕆᔭᐅᓂᖓᓂ ᐃᖅᑲᓇᐃᔮᕆᔭᐅᑦᑎᐊᕋᓗᐊᕐᒪᖔᑦ ᓇᓪᓕᐅᒃᑯᒫᓕᕆᔨᓄᑦ ᐊᑐᓂ ᓈᓚᐅᑎᖃᕐᕕᕕᓃᑦ ᐅᓗᕆᐊᓇᖅᑐᓂᒃ ᐲᔭᐃᕝᕕᐅᔪᑦ ᖃᐅᔨᓴᖅᑕᐅᖃᑦᑕᕆᐊᖃᕐᓂᐊᖅᑐᑦ.  ᑕᒪᒃᑯᐊ ᖃᐅᔨᓴᖅᑕᐅᖃᑦᑕᕐᓂᐊᖅᑐᑦ ᓱᕈᕐᓇᖅᑐᓄᑦ ᐴᕆᔭᑦ ᓯᖁᒥᔭᓐᓂᐊᓐᖏᒃᑲᓗᐊᕐᒪᖔᖏᑦ ᓯᕗᓂᐊᓂ ᐊᐅᓪᓚᐅᔾᔭᐅᕙ ᓪᓕᐊᓕᖅᐸᑕ.  ᕿᑭᖅᑖᓗᖕᒥ ᐊᕙᑎᓕᕆᔨᒃᑯᑦ ᓇᓗᓇᐃᖅᓯᖃᑦᑕᕆᐊᖃᕐᓂᐊᕐᒥᔪᑦ ᓱᕈᕐᓇᖅᑐᑦ ᑲᒪᒋᔭᐅᑦᑎᐊᕋᓗᐊᕐᒪᖔᖏᑦ ᐅᓗᕆᐊᓇᖅᑐᑦ ᓄᒃᑕᖅᑕᐅᓂᖏᓐᓄᑦ ᒪᓕᒐᑦ ᒪᓕᒃᑕᐅᓗᑎᒃ.

ᐅᓗᕆᐊᓇᖅᑐᓖᑦ ᖃᓪᓗᓈᑦ ᓄᓇᖓᓐᓄᑦ ᐊᔾᔨᒌᓐᖏᑦᑐᓄᑦ ᓄᓇᓄᑦ ᐊᐅᓪᓚᖅᑎᑕᐅᖃᑦᑕᕐᓂᐊᖅᑐᑦ ᐅᒥᐊᕐᔪᐊᒃᑯᑦ ᐊᒻᒪ ᐊᑕᐅᓯᐅᓐᖏᑦᑐᓄᑦ ᐊᖏᖅᑕᐅᓯᒪᔪᓄᑦ ᓱᕈᕐᓇᖅᑐᓂᒃ ᓴᓗᒻᒪᖅᓴᐃᕝᕕᖕᓄᑦ ᐊᐅᓪᓚᖅᑎᑕᐅᓕᕐᒥᓗᑎᒃ ᐅᓗᕆᐊᓇᖅᑐᖃᕐᓂᖏᑦᑕ ᐊᔾᔨᒌᓐᖏᓐᓂᖏᑦ ᒪᓕᒃᑕᐅᓗᑎᒃ.

ᕿᑭᖅᑖᓗᒃ ᑯᐊᐳᕇᓴᒃᑯᑦ ᐊᖓᔪᖅᑳᖓᑦ ᕼᐋᓕ ᕙᓚᐅᕈᑎ ᐊᒃᓱᐊᓗᒃ ᑕᒪᑐᒥᖓ ᕿᑭᖅᑖᓗᖕᒥ ᐊᕙᑎᓕᕆᔨᒃᑯᑦ ᑳᓐᑐᕌᒃᑖᖓᓐᓂᒃ ᖁᕕᐊᓲᑎᖃᓚᐅᖅᑐᖅ.  ᐃᒪᐃᓕᓪᓗᓂ, “ᐅᕙᑦᑎᓐᓄᓪᓕ ᑕᒪᓐᓇ ᒪᕐᕈᖕᓂᒃ ᑐᕌᒐᑦᑎᓐᓂᒃ ᑎᑭᐅᑎᔾᔪᑎᒋᓂᐊᖅᑕᕗᑦ;  ᐅᓗᕆᐊᓇᖅᑐᑦ ᓄᓇᒥᐅᑕᐃᑦ, ᓲᕐᓗ ᐲᓰᐲᑦ ᐲᔭᖅᑕᐅᒃᐸᑕ ᓄᓇᒥᑦ ᐱᐅᓂᖅᓴᓪᓚᕆᐅᓂᐊᖅᑐᑦ ᐊᕙᑎᑦᑎᓐᓂᒃ ᐊᒃᓱᐊᓗᒃ ᐊᒃᑐᐃᓂᖃᕈᓐᓇᕐᒪᑕ ᐊᒻᒪᓗ ᕿᑭᖅᑖᓗᖕᒥ ᐊᕙᑎᓕᕆᔨᒃᑯᑦ ᑕᒪᑐᒥᖓ ᑎᒍᓯᓂᖓᒍᑦ ᓇᓗᓇᐃᖅᓯᔾᔪᑎᓪᓚᕆᐅᔪᖅ ᐅᓗᕆᐊᓇᖅᑐᓂᒃ ᑲᒪᒋᔭᖃᕆᐊᖓᓂᒃ ᐱᓕᒻᒪᒃᓯᒪᓂᖅᐹᖑᓂᑦᑎᓐᓂᒃ ᓄᓇᕗᒻᒥ.”

ᕿᑭᖅᑖᓗᖕᒥ ᐊᕙᑎᓕᕆᔨᒃᑯᑦ ᐃᖅᑲᓇᐃᔭᖃᑎᒌᖕᓂᒃᑯᑦ ᐊᖅᑯᑎᒋᔭᐅᔪᖅ ᕿᑭᖅᑖᓗᒃ ᑯᐊᐳᕇᓴᒃᑯᓐᓄᑦ ᐊᒻᒪ ᓴᓂᒃᓴᓐ ᐊᕙᑎᓕᕆᔨᒃᑯᑦ ᐱᔨᑦᑎᖅᑎᖏᓐᓄᑦ (Sanexen)

ᑐᑭᓯᒋᐊᒃᑲᓐᓂᕈᒪᒍᕕᑦ ᖃᐅᔨᒋᐊᕐᕕᒋᔪᓐᓇᖅᑕᐃᑦ:

ᕼᐋᓕ ᕙᓚᐅᕈᑎ
ᕿᑭᖅᑖᓗᒃ ᑯᐊᐳᕇᓴᒃᑯᓐᓄᑦ ᐊᖓᔪᖅᑳᖅ
ᐅᖄᓚᐅᑖ: (867) 979-8400
ᓱᒃᑲᔪᒃᑰᕈᑖ (867) 979-8433