ᕿᑭᖅᑖᓗᒃ ᑯᐊᐳᕇᓴᓐ ᐊᒻᒪ ᓴᒃᑯᒃᑯᑦ ᑲᑐᔾᔨᖃᑎᒌᖕᓂᒃᑰᖃᑎᖃᓕᖅᐳᑦ ᑯᐊᐸᒃᑯᑦ ᐃᓚᒌᓴᖏᓐᓂᒃ ᐊᒻᒪ ᑎᒐᕐᓃ ᐅᒥᐊᕐᔪᐊᓕᕆᔨᖏᓐᓂᒃ ᓂᐅᕕᖃᑕᐅᑎᓪᓗᒋᑦ ᓄᓇᕗᒻᒥ ᐅᒥᐊᕐᔪᐊᓕᕆᔨᒃᑯᓐᓂᒃ

Date: 
17 ᐄᑉᐳ 2012

ᐃᖃᓗᐃᑦ, ᓄᓇᕗᑦ - ᕼᐋᓕ ᕙᓚᐅᕈᑎ, ᐊᖓᔪᖅᑳᕆᔭᐅᔪᖅ ᕿᑭᖅᑖᓗᒃ ᑯᐊᐳᕇᓴᒃᑯᓐᓄᑦ, ᐹᑐᕆᒃ ᑕᒍᕐᓈᖅ, ᐊᖓᔪᖅᑳᖅ ᐊᒻᒪ ᐊᓪᓚᕕᖕᒥ ᐊᖓᔪᖅᑳᕆᔭᐅᔪᖅ ᓴᒃᑯᒃᑐᓐᓄᑦ ᐊᒻᒪ ᐅᐃᓕᐊᒻ ᓚᐃᔪᓪ, ᐊᖓᔪᖅᑳᕆᔭᐅᔪᖅ ᓄᓇᕗᒻᒥ ᐅᒥᐊᕐᔪᐊᓕᕆᔨᒃᑯᓐᓄᑦ ᐊᒻᒪ ᐃᓚᒌᓴᒃᑯᓐᓄᑦ ᑲᑐᔾᔨᓪᓗᑎᒃ ᖁᕕᐊᓱᒃᐳᑦ ᖃᐅᔨᒃᑲᐃᔪᓐᓇᕋᒥᒃ ᑖᒃᑯᐊ ᕿᑭᖅᑖᓗᒃ ᑯᐊᐳᕇᓴᒃᑯᑦ ᐊᒻᒪ ᓴᒃᑯᒃᑯᑦ ᓇᖕᒥᓂᖃᖃᑕᐅᓂᐊᓕᕐᓂᖏᓐᓂᒃ ᐃᖃᓗᖕᓂᒃ ᑐᑦᑕᕐᕕᓕᖕᒥᒃ ᓄᓇᕗᒻᒥ ᐅᒥᐊᕐᔪᐊᓕᕆᔨᒃᑯᑦ ᐅᒥᐊᕐᔪᐊᖓᓐᓂᒃ. ᕿᑭᖅᑖᓗᒃ ᑯᐊᐳᕇᓴᒃᑯᑦ ᐊᒻᒪ ᓴᒃᑯᒃᑯᑦ ᑮᓇᐅᔭᓂᒃ ᓴᒡᕙᐃᑎᓪᓗᒋᑦ ᑖᔅᓱᒧᖓ ᐅᒥᐊᕐᔪᐊᕐᒧᑦ ᕿᑭᖅᑖᓗᖕᒥᐅᑕᐃᑦ ᐊᒻᒪ ᑭᕙᓪᓕᕐᒥᐅᑕᐃᑦ ᓄᓇᑖᖃᑕᐅᓯᒪᔪᑦ ᐃᓚᒋᔭᐅᔾᔪᑎᖃᕐᓂᐊᓕᖅᑐᑦ ᐊᒻᒪ ᓯᕗᒃᑲᖅᑕᖅᑎᓪᓗᕇᑦ ᐅᒥᐊᕐᔪᐊᖃᖅᑎᑦᑎᔩᑦ ᑲᑎᒪᔨᖏᓐᓂ ᓂᕈᐊᖃᑕᐅᔪᓐᓇᖅᓯᓗᑎᒃ, ᑕᐃᒫᒡᓗ ᓇᖕᒥᓂᖃᖃᑕᐅᓂᖓ ᑐᕌᒐᖏᓐᓄᑦ ᒪᓕᒃᓯᒪᑦᑎᐊᖅᖢᓂ, ᓄᓇᕗᒻᒥ ᒪᑭᒪᔪᓐᓇᑦᑎᐊᖅᑐᓂ ᑮᓇᐅᔭᓕᐅᕋᓱᐊᕐᓂᕐᓂ ᐃᓚᒋᔭᐅᖃᑕᐅᓂᖅ. ᑎᑎᖅᑲᑎᒍᑦ ᕼᐋᓕ ᕙᓚᐅᕈᑎ ᐃᒫᒃ ᐅᖃᓚᐅᖅᑐᖅ, “ᕿᑭᖅᑖᓗᒃ ᑯᐊᐳᕇᓴᒃᑯᑦ ᐅᐱᑉᐳᑦ ᓇᖕᒥᓂᖃᖃᑕᐅᔪᓐᓇᕋᒥᒃ ᑕᒪᒃᑮᒃ ᐃᓄᖕᓄᑦ ᐊᒻᒪ ᑲᒻᐸᓂᓄᑦ ᒪᑭᒪᑦᑎᐊᕈᓐᓇᖅᑐᓂ ᓄᓇᕗᑦ ᐃᓗᐊᓂ..”

ᓄᓇᕗᑦ ᐅᐸᓗᖓᐃᔭᑦᑎᐊᖅᓯᒪᕗᑦ ᑮᓇᐅᔭᓕᐅᕋᓱᐊᕈᑏᑦ ᐃᖅᑲᓇᐃᔮᒃᓴᓪᓗ ᐱᕙᓪᓕᐊᑐᐃᓐᓇᕐᓂᐊᖅᑎᓪᓗᒋᑦ, ᐱᔾᔪᑎᒋᓗᐊᕐᓗᒍ ᓄᓇᒥᐅᑕᐃᑦ ᓄᓇᕗᑦ ᐃᓗᐊᓃᑦᑐᑦ. ᑕᒪᑐᒪ ᓱᓕᓂᖓ ᓇᓗᓇᐃᖅᑕᐅᓚᐅᖅᑐᖅ ᐹᑐᕆᒃ ᑕᒍᕐᓈᑉ ᐊᒻᒪ ᓄᓇᕗᒻᒥ ᐅᒥᐊᕐᔪᐊᓕᕆᔨᒃᑯᑦ ᐆᒃᑑᑎᑦᑎᐊᕙᐅᕗᖅ ᐃᒪᐃᔾᔪᑕᐅᔪᓐᓇᕐᓂᐊᕐᒪᑦ “…ᓴᒃᑯᒃᑯᑦ ᐃᓚᒋᔭᐅᖃᑕᐅᔪᓐᓇᖅᓯᓂᐊᖅᑐᑦ ᓄᓇᒥᐅᑕᓂᓐᖔᖅᑐᓂᒃ ᐊᑐᕐᓗᑎᒃ ᖃᑭᕙᓪᓕᐊᖃᑕᐅᓂᕐᒥ, ᐊᒻᒪ ᐱᔨᑦᑎᕈᑎᓂᒃ ᐊᑐᓪᓚᕆᒃᑐᓂᒃ ᐱᔨᑦᑎᖃᑕᐅᓗᑎᒃ ᐅᔭᕋᖕᓂᐊᖅᑎᓄᑦ”.

ᕿᑭᖅᑖᓗᒃ ᑯᐊᐳᕇᓴᒃᑯᑦ ᐊᒻᒪ ᓴᒃᑯᒃᑯᑦ ᓇᖕᒥᓂᖃᖃᑕᐅᓕᕐᓂᐊᕐᓂᖏᑦ ᖁᕕᐊᒋᔭᐅᓪᓚᕆᓚᐅᖅᑐᖅ ᐅᐃᓕᐊᒻ ᓚᐃᔪᓪᒧᑦ ᐃᒪᐃᓕᓪᓗᓂ; “ᓄᓇᕗᒻᒥ ᐅᒥᐊᕐᔪᐊᓕᕆᔨᒃᑯᑦ ᑐᓐᖓᓴᐃᕗᑦ ᕿᑭᖅᑖᓗᒃ ᑯᐊᐳᕇᓴᒃᑯᓐᓂᒃ ᐊᒻᒪ ᓴᒃᑯᒃᑯᓐᓂᒃ ᓇᖕᒥᓂᖃᖃᑕᐅᓕᖅᑎᓪᓗᒋᑦ ᐊᒻᒪ ᓂᕆᐅᒃᐳᒍᑦ ᐃᖅᑲᓇᐃᔭᖃᑎᒌᖕᓂᐊᕐᓂᑦᑎᓐᓂᒃ ᐊᒻᒪ ᓴᖅᑭᑦᑎᖃᑦᑕᕐᓂᐊᕐᓂᑦᑎᓐᓂᒃ ᑮᓇᐅᔭᓕᐅᕋᓱᐊᕈᑎᓂᒃ, ᑕᒪᓐᓇ ᐃᓚᒋᔭᐅᖃᑕᐅᑐᐃᓐᓇᕐᒪᑦ ᓄᓇᕗᒻᒥ ᐅᒥᐊᕐᔪᐊᓕᕆᓂᐅᑉ ᑐᓐᖓᕕᓕᐊᕆᓯᒪᔭᖓᓐᓄᑦ.”

ᐱᕙᓪᓕᐊᔪᓕᕆᔨᒃᑯᑦ ᑐᓐᖓᓱᒃᑎᑕᐅᕗᑦ ᐅᑭᐅᖅᑕᖅᑐᒥ ᓯᓂᒃᑕᕐᕕᖕᒥ ᑲᑎᓐᓂᕆᓂᐊᖅᑕᑦᑎᓐᓄᑦ ᐃᖃᓗᖕᓂ ᐊᐃᑉᐱᕐᒥ, ᐊᐃᕐᕆᓕ 17-ᒥ 7-ᒧᐊᖅᐸᑦ ᐅᓐᓄᒃᑯᑦ.

ᑐᑭᓯᒋᐊᒃᑲᓐᓂᕈᒪᒍᕕᑦ, ᖃᐅᔨᒋᐊᕐᕕᒋᔪᓐᓇᖅᑕᑎᑦ ᐅᑯᐊ:
ᑯᐊᐸᒃᑯᑦ ᐃᓚᒌᓴᑦ

ᐊᖓᔪᖅᑳᑉ ᑐᖏᓕᖓ, ᓂᐅᕐᕈᑎᖃᕋᓱᐊᕐᓂᕐᒧᑦ ᓱᓇᒃᑯᑖᓕᕆᓂᕐᒧᓪᓗ, ᑐᕙᐃᓐ ᐱᐅᓪᓴᓐ
ᐊᑭᖃᓐᖏᑦᑐᖅ: 1-800-787-0559
1645 Inkster Blvd
Winnipeg, Manitoba
R2X 2W7
ᖃᕆᓴᐅᔭᒃᑯᑦ ᑐᕌᕈᑖ: mpr@arcticco-op.com
ᖃᕆᓴᐅᔭᒃᑯᑦ ᐱᑐᒍᑖ: www.arcticco-op.com

ᓄᓇᕗᒻᒥ ᐅᒥᐊᕐᔪᐊᓕᕆᔩᑦ (NSSI)
ᐊᐅᓚᑦᓯᔨ, ᕙᒍᐃ ᕋᐃᔅ
ᐊᑭᖃᓐᖏᑦᑐᖅ: 1-866-732-5438
1121 ᒥᕝᕕᒃ, ᑎᑎᖅᑲᒃᑯᕕᐊ 697
ᐃᖃᓗᐃᑦ, ᓄᓇᕗᑦ X0A 0H0 ᖃᕆᓴᐅᔭᒃᑯᑦ ᑐᕌᕈᑖ: nssi.iqaluit@arcticco-op.com
ᖃᕆᓴᐅᔭᒃᑯᑦ ᐱᑐᒍᑖ: www.arcticsealift.com

ᕿᑭᖅᑖᓗᒃ ᑯᐊᐳᕇᓴᓐ
ᐊᑭᖃᓐᖏᑦᑐᖅ:1-888-979-4047 ᑎᑎᖅᑲᒃᑯᕕᐊ 1228 ᐃᖃᓗᐃᑦ, ᓄᓇᕗᑦ X0A 0H0
ᖃᕆᓴᐅᔭᒃᑯᑦ ᑐᕌᕈᑖ: info@qcorp.ca ᖃᕆᓴᐅᔭᒃᑯᑦ
ᐱᑐᒍᑖ: www.qcorp.ca

ᓴᒃᑯ ᑯᐊᐳᕇᓴᓐ
ᑎᑎᖅᑲᒃᑯᕕᐊ 188 ᑲᖏᖅᖠᓂᖅ, ᓄᓇᕗᑦ X0C 0G0
ᐅᖄᓚᐅᑖ: 1-867-645-2805
ᖃᕆᓴᐅᔭᒃᑯᑦ ᑐᕌᕈᑖ: investments@qiniq.com ᖃᕆᓴᐅᔭᒃᑯᑦ
ᐱᑐᒍᑖ: www.sakkuinvestments.ca

ᑭᓇᒃᑰᓂᖏᓐᓄᑦ ᓇᓗᓇᐃᔭᐅᑏᑦ:

ᑯᐊᐸᒃᑯᑦ ᐃᓚᒌᓴᓐ (ACL) ᐱᔨᑦᑎᖅᑎᐅᕗᑦ ᓇᖕᒥᓂᕆᔭᐅᓪᓗᑎᒃ 31-ᓄᑦ ᐃᒻᒥᒃᑰᖅᑐᓄᑦ ᑯᐊᐸᓄᑦ ᓄᓇᕗᒻᒦᑦᑐᓄᑦ ᐊᒻᒪ ᓄᓇᑦᓯᐅᕐᒥᐅᑦ ᑯᐊᐸᖏᓐᓄᑦ. ᑯᐊᐸᐃᑦ ᓄᓇᕗᒻᒥ ᐊᒥᓱᐊᓗᖕᓄᑦ ᐃᓄᖕᓄᑦ ᓇᖕᒥᓂᕆᔭᐅᕗᑦ, ᐊᒻᒪ ᑮᓇᐅᔭᓕᐅᕋᓱᐊᖅᑎᑦᑎᓪᓗᑎᒃ ᐊᒥᓱᐊᓗᖕᓂᒃ ᓄᓇᕗᒻᒥᐅᓂᒃ ᐃᖅᑲᓇᐃᔮᑎᒍᑦ, ᓴᓇᓐᖑᐊᒐᐃᕐᕕᐅᖃᑦᑕᕐᓂᒃᑯᑦ, ᕿᓯᖕᓂᒃ ᒥᖅᑯᓕᖕᓂᒡᓗ ᓂᐅᕕᖃᑦᑕᖅᖢᑎᒃ ᐊᒻᒪ ᐊᓯᖏᓐᓂᒃ ᑮᓇᐅᔭᓕᐅᕋᓱᐊᕈᑎᓂᒃ ᓴᖅᑭᔮᖅᑎᑦᑎᔨᐅᓪᓗᑎᒃ. ᑯᐊᐸᒃᑯᑦ ᐃᓚᒌᓴᑦ ᑐᕌᒐᖃᖅᐳᑦ ᐱᔨᑦᑎᕈᑎᓂᒃ ᓴᖅᑭᔮᖅᑎᑦᑎᔨᐅᓂᐊᕐᓂᕐᒥᒃ, ᐊᒻᒪ ᑲᑐᔾᔨᖃᑎᒌᖕᓂᕐᒥᒃ, ᐱᔨᑦᑎᖅᑎᐅᓗᑎᒡᓗ ᐃᒻᒥᒃᑰᖅᑐᓄᑦ ᑯᐊᐸᓄᑦ, ᓯᕗᒃᑲᖅᑕᖅᑎᐅᓗᑎᒃ ᐊᒻᒪ ᖃᐅᔨᒪᔨᑕᕆᔭᐅᓗᑎᒃ ᓄᓇᓖᑦ ᓴᖅᑭᑦᑎᓇᓱᖕᓂᐊᖅᑎᓪᓗᒋᑦ ᓄᓇᓕᖕᓂ ᑐᓐᖓᕕᓕᖕᓂᒃ ᐱᓯᓂᓯᐅᔪᓂᒃ ᑮᓇᐅᔭᓕᐅᕋᓱᐊᕈᑎᒃᓴᓂᒡᓗ, ᐃᒻᒥᒃᑰᕐᓗᑎᒃ ᓇᖕᒥᓂᖃᕐᓂᒃᑯᑦ ᒪᑭᒪᑦᑎᐊᕈᓐᓇᕐᓂᐊᕐᒪᑕ.

ᑎᒑᕐᓃ ᐅᒥᐊᕐᔪᐊᓕᕆᔨᖏᑦ (DTI), 'Groupe Desgagnés'-ᑯᓐᓄᑦ ᐃᓚᒋᔭᐅᖃᑕᐅᓪᓗᑎᒃ, ᑖᒃᑯᐊ ᐅᒥᐊᕐᔪᐊᖃᖅᑎᐅᕗᑦ ᐊᒡᔭᖅᑐᐃᖃᑦᑕᖅᖢᑎᒃ ᑎᑭᓵᕕᓂᕐᓂᒃ ᐊᒻᒪ ᐱᓕᒻᒪᒃᓯᒪᑦᑎᐊᖅᖢᑎᒃ ᐅᑭᐅᖅᑕᖅᑐᒥ ᐅᒥᐊᕐᔪᐊᒃᑰᖅᑎᑦᑎᓂᐅᕙᒃᑐᓅᖓᔪᓂ. ᑎᒑᕐᓃ ᐅᒥᐊᕐᔪᐊᓕᕆᔨᖏᑦ ᐊᑐᖅᑕᐅᕙᒃᐳᑦ ᐃᓄᒃᑕᖅᑎᐅᓪᓗᑎᒃ ᐊᒻᒪ ᑎᑭᓵᕕᓂᕐᓂᒃ ᐊᐅᓪᓚᐅᔾᔨᔨᐅᓪᓗᑎᒃ, ᐊᐅᓚᑦᓯᔨᐅᓪᓗᑎᒡᓗ ᐅᒥᐊᕐᔪᐊᒃᑰᖅᑐᒃᓴᑦ ᐊᐅᓚᑕᐅᓂᖏᓐᓂᒃ ᐊᒻᒪ ᑕᒪᒃᑯᓄᖔᖅᑐᓂᒃ ᐱᔨᑦᑎᕈᑎᓂᒃ ᓴᖅᑭᔮᖅᑎᑦᑎᔨᐅᓪᓗᑎᒃ. ᐊᑐᖃᑦᑕᖅᑐᑦ ᐅᖁᒪᐃᑦᑐᖅᓯᐅᑎᓂᒃ ᑭᕕᒃᓯᔾᔪᑎᓂᒃ, ᓯᑯᓯᐅᑕᐅᓪᓗᑎᓂᒡᓗ ᐅᒥᐊᕐᔪᐊᕐᓂᒃ ᐊᑐᖃᑦᑕᖅᖢᑎᒃ ᓄᓇᕗᒻᒥ ᐅᒥᐊᕐᔪᐊᓕᕆᔨᒃᑯᑦ ᐅᓯᔭᒃᓴᖏᑦ ᐅᓄᖅᓯᕙᓪᓕᐊᑐᐃᓐᓇᖅᑎᓪᓗᒋᑦ, ᐊᒻᒪ ᐊᐅᓚᑦᓯᓲᖑᓪᓗᑎᒃ ᑕᒪᒃᑯᐊ ᐅᒥᐊᕐᔪᐊᒃᑰᖅᑎᑦᑎᔪᒪᔪᑦ ᑭᓐᖒᒪᔭᖏᑦ ᐊᖑᒻᒪᑎᔭᐅᔪᓐᓇᕐᓂᐊᕐᒪᑕ ᖄᖏᐅᔾᔭᐅᔪᓐᓇᕐᓂᐊᕐᒪᑕᓘᓐᓃᑦ.

ᓄᓇᕗᒻᒥ ᐅᒥᐊᕐᔪᐊᓕᕆᔩᑦ (NSSI) ᐅᐱᑉᐳᑦ ᓯᕗᒃᑲᖅᑕᖅᑎᒋᔭᐅᒐᒥᒃ ᐅᑭᐅᖅᑕᖅᑐᒥ ᐅᒥᐊᕐᔪᐊᒃᑰᖅᑎᑦᑎᔨᐅᓂᕐᒥᖕᓂ, ᐊᒻᒪ ᐃᓚᒋᔭᐅᖃᑕᐅᓪᓗᑎᒃ ᐃᓚᒌᓴᒃᑯᑦ ᐊᒻᒪ ᑎᒎᕐᓃ ᐅᒥᐊᕐᔪᐊᓕᕆᔨᖏᓐᓂ ᓴᖅᑭᑦᑎᖃᑕᐅᓚᐅᖅᓯᒪᓂᕐᒥᖕᓂᒃ 2000-ᖑᑎᓪᓗᒍ, ᐱᐅᓂᖅᐹᓂᒃ ᐱᔨᑦᑎᕈᑎᓂᒃ ᓴᖅᑭᔮᖅᑎᑦᑎᔪᓐᓇᕐᓂᐊᕋᒥᒃ ᓄᓇᕗᒻᒥ ᐅᒥᐊᕐᔪᐊᒃᑰᖅᑎᑦᑎᖃᑦᑕᖅᑐᓄᑦ. ᐅᒥᐊᕐᔪᐊᖁᑎᖏᑦ ᐅᖁᒪᐃᑦᑐᖅᓯᐅᑎᓂᒃ ᑭᕕᒃᓯᔾᔪᑎᓂᒃ ᐃᓪᓕᕆᕕᐅᓯᒪᔪᑦ ᐱᔨᑦᑎᖅᑎᐅᔪᓐᓇᕐᓂᐊᕋᒥᒃ ᓄᓇᕗᒻᒥᐅᑦ ᓄᓇᓕᖏᓐᓄᑦ, ᒐᕙᒪᒃᑯᓐᓄᑦ, ᐃᓄᖕᓄᑦ ᐊᒻᒪ ᐱᓯᓂᓯᖃᖅᑐᓄᑦ. ᓄᓇᕗᒻᒥ ᐅᒥᐊᕐᔪᐊᓕᕆᔩᑦ ᐊᑯᓂᕈᓗᒃ ᑲᔪᓯᓂᖃᑦᑎᐊᖅᓯᒪᓕᖅᑐᑦ ᑲᓇᑕᐅᑉ ᐅᑭᐅᖅᑕᖅᑐᖓᓂ, ᐊᒻᒪ ᐊᒡᔭᖅᑐᐃᖃᑦᑕᖅᖢᑎᒃ ᓱᓇᒃᑯᑖᓂᒃ ᖃᓄᐃᑦᑐᑐᐃᓐᓇᑦᑎᐊᓂᒃ ᑮᓇᐅᔭᖅᑐᓗᐊᕋᑎᒃ, ᐊᑦᑕᓇᔾᔭᐃᖅᓯᒪᑦᑎᐊᖅᖢᑎᒃ ᐊᒻᒪ ᑕᑎᒋᔭᐅᔪᓐᓇᑦᑎᐊᖅᖢᑎᒃ.

ᕿᑭᖅᑖᓗᒃ ᑯᐊᐳᕇᓴᓐ (QC) ᐃᓄᖕᓄᑦ ᓇᖕᒥᓂᕆᔭᐅᓪᓗᑎᒃ ᑮᓇᐅᔭᓕᐅᕋᓱᐊᖅᑎᐅᕗᑦ ᐊᒻᒪ ᓴᖅᑭᑕᐅᓚᐅᖅᓯᒪᓪᓗᑎᒃ ᕿᑭᖅᑖᓗᖕᒥ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ (ᒫᓐᓇ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ ᑕᐃᔭᐅᖃᑦᑕᓕᖅᑐᑦ). ᕿᑭᖅᑖᓗᒃ ᑯᐊᐳᕇᓴᒃᑯᑦ ᐱᔭᒃᓴᓪᓗᐊᑕᖃᖅᐳᑦ ᐃᖅᑲᓇᐃᔭᖅᑎᑦᑎᖃᑦᑕᕐᓂᕐᒥᒃ ᐊᒻᒪ ᑮᓇᐅᔭᓕᐅᕋᓱᐊᖅᑎᑦᑎᓂᕐᒥᒃ ᐃᓄᖕᓂᒃ ᕿᑭᖅᑖᓗᖕᒥᐅᓂᒃ ᓯᓚᑖᓃᑦᑐᓂᒡᓗ. ᕿᑭᖅᑖᓗᒃ ᑯᐊᐳᕇᓴᒃᑯᑦ ᐃᓚᓕᐅᑎᕙᓪᓕᐊᔪᒪᔪᑦ ᖃᓄᐃᑦᑐᑐᐃᓐᓇᕐᓄᑦ ᓄᓇᕗᒻᒥᐅᑦ ᑮᓇᐅᔭᓕᐅᖃᑕᐅᑦᑎᐊᕈᓐᓇᕐᓂᐊᕐᒪᑕ. ᐱᖅᑯᓯᑐᖃᐃᑦ ᐊᒻᒪ ᐅᓪᓗᒥᓯᐅᑏᑦ ᑕᐱᕐᖢᒋᑦ, ᕿᑭᖅᑖᓗᒃ ᑯᐊᐳᕇᓴᒃᑯᑦ ᐱᕚᓪᓕᖅᑎᑦᑎᔪᒪᔪᑦ ᐃᓅᓯᒃᑯᑦ ᑮᓇᐅᔭᓕᐅᕋᓱᐊᕈᑎᒃᑯᓪᓗ ᕿᑭᖅᑖᓗᖕᒥᐅᑦ ᐃᓄᖁᑎᖏᓐᓄᑦ ᑮᓇᐅᔭᓂᒃ ᐃᓕᓯᖃᑦᑕᕐᓂᒃᑯᑦ ᐊᒻᒪ ᓴᖅᑭᑦᑎᖃᑦᑕᕐᓂᒃᑯᑦ ᑮᓇᐅᔭᓕᐅᕋᓱᐊᕈᑕᐅᔪᓐᓇᖅᑐᓄᑦ.

ᓴᒃᑯ ᑯᐊᐳᕇᓴᓐ (ᓴᒃᑯᒃᑯᑦ) ᑮᓇᐅᔭᓕᐅᕋᓱᐊᖅᑎᐅᓪᓗᑎᒃ ᑲᑉᐸᓂᐅᕗᑦ ᓇᖕᒥᓂᕆᔭᐅᓪᓗᑎᒃ ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᖏᓐᓄᑦ. ᓄᓇᕗᒻᒥ ᓄᓇᑖᕐᓂᕐᒧᑦ ᐊᖏᕈᑏᑦ ᐃᓗᓕᖏᑦᑎᒍᑦ, ᑭᕙᓪᓕᕐᒥ ᐃᓄᐃᑦ ᑲᑐᔾᔨᖃᑎᒌᖏᑦ ᐱᔭᒃᓴᖅᑖᖅᑎᑕᐅᓯᒪᕗᑦ ᐅᓄᖅᑐᓂᒃ ᐱᔾᔪᑎᓕᖕᓂᒃ ᓄᓇᑖᕐᓂᒃᑯᑦ ᐊᖏᕈᑏᑦ ᐊᑐᓕᖅᑎᑕᐅᕙᓪᓕᐊᓂᖏᓐᓂᒃ, ᑖᒃᑯᐊᓗ ᓴᒃᑯᒃᑐᑦ ᑮᓇᐅᔭᓕᐅᕋᓱᐊᖅᑎᐅᓪᓗᑎᒃ ᐊᒻᒪ ᓇᓗᓇᐃᖅᑕᐅᓯᒪᓪᓗᑎᒃ ᐃᓄᐃᑦ ᓄᓇᑖᕐᓂᒃᑯᑦ ᑯᐊᐳᕇᓴᖏᓐᓂᒃ. ᓴᒃᑯᒃᑯᑦ ᑐᕌᒐᖃᖅᐳᑦ ᒪᑭᒪᑦᑎᐊᕈᓐᓇᖅᑐᓂᒃ ᑮᓇᐅᔭᓕᐅᕋᓱᐊᕈᑎᓂᒃ ᓴᖅᑭᑦᑎᓗᑎᒃ ᐃᓄᖕᓄᑦ ᑭᕙᓪᓕᕐᒥᐅᓄᑦ. ᑕᐃᒪᓐᖓᓂᑦ ᓴᖅᑭᑕᐅᓚᐅᖅᓯᒪᒐᒥᒃ 1989-ᒥ, ᓴᒃᑯᒃᑯᑦ ᑐᕌᒐᓕᐊᕕᓂᕐᒥᓄᑦ ᐊᖑᒻᒪᑎᑦᑎᐊᖅᑐᑦ ᑲᑐᔾᔨᖃᑎᒌᖕᓂᒃᑰᖃᑎᖃᖃᑦᑕᕐᓂᒃᑯᑦ ᐊᒻᒪ ᐱᓕᒻᒪᒃᓯᒪᓂᕐᒥᒍᑦ ᐊᖅᑯᑎᒋᓪᓗᒋᑦ ᐊᓯᖏᑦ ᑯᐊᐳᕇᓴᓐᖑᖅᑎᑕᐅᓯᒪᔪᑦ.

PDF