ᕿᑭᖅᑖᓗᒃ ᑯᐊᐳᕇᓴᒃᑯᑦ ᓇᓗᓇᐃᕐᓯᕗᑦ 4ᓂᑦ ᓄᑖᓂᑦ ᐃᓕᓐᓂᐊᕈᓯᐊᔅᓴᓂᑦ

Date: 
15 ᔪᓚᐃ 2014

ᕿᑭᖅᑖᓗᒃ ᑯᐊᐳᕇᓴᒃᑯᑦ ᐊᒻᒪᓗ ᑎᒥᖁᑎᖏᑦ: ᕿᑭᖅᑕᓗᒃ ᓇᒻᒥᓂᖁᑎᖏᑦ, ᕿᑭᖅᑖᓗᒻᒥ ᐅᖅᓴᒃᕕᒃ ᑎᒥᖓᑦ ᐊᒻᒪᓗ ᕿᑭᖅᑕᓂ ᓴᓇᔪᓕᕆᓂᕐᒧᑦ ᑎᒥᖁᑖ; ᖁᕕᐊᓱᑦᑐᑦ ᓇᓗᓇᐃᕐᓯᔭᕆᐊᔅᓴᖅ ᑎᓴᒪᓂᑦ ᐃᓕᓐᓂᐊᕈᓯᐊᖅᑖᑎᑦᑎᓛᕐᖓᑕ $6,000ᓂᑦ ᐊᑐᓂᑦ, ᐅᑭᐊᔅᓵᖅ ᕿᑭᖅᑕᓂ ᓄᓇᑖᖃᑕᐅᓯᒪᔪᓄᑦ ᓯᓚᑦᑐᓴᕐᕕᒻᒥ ᐃᓕᓐᓂᐊᕆᐊᓛᖅᑐᓄᑦ. ᒪᑐᕕᔅᓴᓕᒃ ᐱᓇᓱᐊᕐᕕᔅᓴᖅ ᐋᒡᒌᓯ 29, 2014ᒥ. 

ᐃᓕᓐᓂᐊᕈᓯᐊᔅᓴᖅ ᐊᑐᐃᓐᓇᐅᑎᑕᐅᕗᑦ ᐅᑯᓂᖓ ᐃᓕᓐᓂᐊᖅᑕᐅᒐᔭᖅᑐᓂᑦ:

  • ᑮᓇᐅᔭᓕᕆᓂᕐᒥ, ᐊᓪᓚᑦᑎᐅᓂᕐᒥ ᐅᕝᕙᓘᓐᓃᑦ ᐊᐅᓚᑦᑎᓂᕐᒥ 
  • ᐊᕙᑎᓕᕆᓂᕐᒥ ᐅᕝᕙᓘᓐᓃᑦ ᐱᓕᕆᐊᕐᒥᒃ ᐊᐅᓚᑦᑎᓂᕐᒥᒃ
  • ᓇᒻᒥᓂᖁᑎᓕᕆᓂᕐᒥᒃ, ᐃᓪᓗᓕᐅᕐᓂᕐᒥᒃ ᐅᕝᕙᓘᓐᓃᑦ ᓴᓇᔪᓕᕆᓂᕐᒥ
  • ᓂᐅᕕᕐᕕᒻᒥ ᐅᕝᕙᓘᓐᓃᑦ ᐃᖅᑲᓇᐃᔮᕐᒥᒃ ᐊᐅᓚᑦᑎᓂᕐᒥᒃ 

“30ᓂᑦ ᐊᕐᕌᒎᓕᖅᑐᓂᑦ, ᕿᑭᖅᑖᓗᒃ ᑯᐊᐳᕇᓵᒃᑯᑦ ᑲᔪᓯᑎᑦᑎᕙᓪᓕᐊᑎᐊᖅᑐᑎᒃ ᐃᖅᑲᓇᐃᔮᖃᕐᓯᒪᒻᒪᑕ ᐃᓄᓐᓂᑦ ᐱᓕᕆᔪᓐᓇᕐᓯᑎᑦᑎᕙᓪᓕᐊᓂᕐᒥᒃ ᐃᖅᑲᓇᐃᔭᕐᓂᕐᒥ ᐊᒻᒪᓗ ᑖᓐᓇ ᐱᓕᕆᐊᖅ ᐋᖅᑭᑦᑕᐅᓯᒪᒻᒪᑕ ᐃᓕᓴᕐᓯᒍᑎᖃᖅᑐᑎᒃ ᐱᔾᔪᑎᖓᓐᓂᒃ ᐊᒻᒪᓗ ᑖᓐᓇ ᑐᕌᒐᓕᐊᖑᓯᒪᔪᖅ ᓯᕗᒧᐊᒍᑕᐅᒃᑲᓐᓂᖁᓪᓗᒍ,” ᐅᖃᖅᑐᖅ ᓕᕙᐃ ᐹᓇᐸᔅ, ᐃᔅᓯᕙᐅᑕᖅ ᑲᑎᒪᔨᓄᑦ. 

“ᐱᓇᓱᐊᖅᑐᑦ ᖃᐅᔨᒋᐊᖃᑦᑕᕈᓐᓇᖅᑐᑦ ᐃᑭᐊᖅᑭᕕᑦᑎᓐᓄᑦ ᐅᕗᖓ www.qcorp.ca ᐱᓇᓱᐊᕈᑏᑦ ᒥᔅᓵᓄᑦ”; ᐅᖃᖅᑐᖅ Hᐊᐅᓕ ᕙᓚᐅᕋᑎ, ᐊᖏᔪᖅᑳᖅ. “ᖁᕕᐊᓱᓪᓚᕆᑦᑐᒍᑦ ᐃᓕᓐᓂᐊᕈᓯᐊᖅᑖᑎᑦᑎᒍᑎᒋᖃᑦᑕᓂᐊᖅᑕᑦᑕ ᒥᔅᓵᓄᑦ ᐊᒻᒪᓗ ᓂᕆᐅᑦᑐᑕ ᐱᓕᕆᖃᑎᖃᖃᑦᑕᓂᐊᕐᓂᑎᓐᓂᒃ ᐃᓕᓐᓂᐊᕈᓯᐊᖅᑖᖃᑦᑕᓂᐊᖅᑐᓂᑦ ᐃᓕᓐᓂᐊᕐᓂᖏᓐᓂ ᐃᖅᑲᓇᐃᔮᕐᑖᐸᓪᓕᐊᓂᖏᓐᓂᓪᓗ.” 

ᑐᑭᓯᒋᐊᒃᑲᓐᓂᕈᒪᒍᔅᓯ ᑐᑭᓯᒋᐊᕐᕕᐅᖃᑦᑕᕐᓕ:

Hᐊᐅᓕ ᕙᓚᐅᕋᑎ
ᐊᖏᔪᖅᑳᖅ, ᕿᑭᖅᑖᓗᒃ ᑯᐊᐳᕇᓴᒃᑯᓐᓂ
ᑎᑎᖅᑲᓂᐊᕐᕕᖓ 1228
ᐃᖃᓗᐃᑦ, ᓄᓇᕗᑦ 
X0A 0H0
ᐅᖄᓚᐅᑖ (867) 979-8400