ᕿᑭᖅᑖᓗᒃ ᑯᐊᐳᕇᓴᒃᑯᑦ ᐃᑲᔪᕐᓯᔪᑦ ᕿᑭᖅᑕᓂ ᓄᓇᖓᓂ ᐃᓕᓐᓂᐊᕐᕖᑦ ᐅᓪᓛᕈᒻᒥᓴᖅᑎᑕᐅᖃᑦᑕᕐᓂᖏᓐᓂᒃ

Date: 
29 ᓄᕕᐱᕆ 2013

ᔭᓐᓄᐊᓕ 13, 2014

ᓇᓪᓕᐅᓂᕐᓯᐅᕐᓂᖓᒍᑦ ᕿᑭᖅᑖᓗᒃ ᑯᐊᐳᕇᓴᒃᑯᑦ 30-ᖃᓕᕐᓂᖏᓐᓂᒃ ᓇᓪᓕᐅᓐᓂᖓᓂ ᑲᑎᒪᔩᑦ ᖁᕕᐊᓱᑉᐳᑦ ᑐᓴᖅᑎᑦᓯᔭᕆᐊᒃᓴᖅ ᐃᑲᔫᑎᖃᕈᓐᓇᓚᐅᕐᓂᕐᒥᓂᒃ $16,000.00 ($1,000.00 ᐊᑐᓂᑦ ᑐᓂᔭᐅᓪᓗᑎᒃ 16 ᐃᓕᓐᓂᐊᕐᕖᑦ ᕿᑭᖅᑕᓂ ᓄᓇᖓᓂ) ᐅᓪᓛᕈᒻᒥᓴᖅᑎᑦᓯᖃᑦᑕᓂᕐᒧᑦ. ᒪᒃᑯᑦᑐᑦ ᐃᓕᓐᓂᐊᕆᐊᖃᑦᑕᓲᖑᒻᒪᑕ ᑭᓱᑐᕋᑦᓴᖃᓐᖏᓂᕐᒧᑦ ᓂᕆᓚᐅᓐᖏᓯᐊᖅᑐᑎᒃ ᐊᖏᕐᕋᒥ ᐊᒻᒪᓗ ᐃᓛᓐᓂᒃᑯᑦ; ᓱᕈᓰᑦ ᐅᓪᓛᕈᒻᒥᓴᕈᓐᓇᕐᓯᖃᑦᑕᕋᑎᒃ, ᖃᓄᐃᓕᐅᓂᕐᓗᓂᕐᒧᑦ ᑎᑭᒍᑕᐅᕙᑦᑐᖅ ᐊᒻᒪᓗ ᖁᑦᓯᓂᕐᓴᒥᒃ ᐃᓕᓐᓂᐊᓂᕐᒧᑦ ᓱᕐᕋᐃᓪᓗᓂ.

ᐊᕐᕌᒍᑕᒫᑦ ᕿᑭᖅᑖᓗᒃ ᑯᐊᐳᕇᓴᒃᑯᑦ ᓴᓂᕐᕙᐃᖃᑦᑕᓲᑦ ᑮᓇᐅᔭᑦ ᐊᑐᖅᑐᒃᓴᓂᒃ ᐃᑲᔫᑎᒃᓴᓂᒃ ᐊᑑᑎᖃᑦᓯᐊᕈᓐᓇᖅᑐᓂᒃ ᒪᒃᑯᑦᑐᓄᑦ ᐊᒻᒪᓗ ᓄᓇᓕᓐᓂ ᐊᐅᓚᓂᐅᔪᓄᑦ. 30-ᖃᓕᕐᓂᑎᓐᓄᑦ ᓇᓪᓕᐅᓂᕐᓯᐅᑎᓪᓗᑕ ᖃᐅᔨᓇᓱᐊᓚᐅᕋᑦᑕ ᒪᒃᑯᑦᑐᓅᖓᔪᓂᒃ ᐃᑲᔪᕐᕕᒃᓴᕆᔪᓐᓇᑕᑦᑎᓐᓂᒃ.

“ᑲᑎᒪᔨᓃᓐᖔᕐᓗᖓ ᖁᕕᐊᓱᑉᐳᖓ ᐃᑲᔪᕈᓐᓇᓂᑦᑎᒍᑦ ᑐᓂᓯᔪᓐᓇᓂᑦᑎᓐᓂᒃ ᓄᓇᓕᖕᓄᑦ ᐃᑲᔫᑎᓂᒃ ᑖᑦᓱᒧᖓ ᐊᑑᑎᓕᒻᒪᕆᐊᓘᔪᒧᑦ ᒪᒃᑯᑦᑐᑦ ᐱᕙᓪᓕᐊᒍᑎᒃᓴᖏᓐᓄᑦ ᐊᒻᒪᓗ ᐱᕚᓪᓕᕈᑎᒃᓴᒥᒃ ᓄᓇᓖᑦ ᖃᓄᐃᓐᖏᑲᓐᓂᕈᑎᒃᓴᖏᓐᓄᑦ,” ᓕᕙᐃ ᐹᓇᐹᓯ, ᐃᒃᓯᕙᐅᑕᖅ.

ᑮᓇᐅᔭᖅᑑᑎᒃᓴᑦ ᐃᑲᔫᑎᖃᕐᓂᐊᖅᑐᑦ ᓱᕈᓯᕐᓄᑦ ᕿᑭᖅᑕᓂ ᓄᓇᖓᓂ ᐅᓄᖅᑐᑎᒍᑦ:

  • ᓵᓐᖓᓂᕐᓴᐅᒍᓐᓇᓕᕐᓗᑎᒃ ᐃᓕᓐᓂᐊᓯᐊᕐᓂᕐᓴᐅᓕᕐᓗᑎᒃ ᐃᓕᓐᓂᐊᕐᕕᖕᒥᓂ,
  • ᓴᕐᖓᑎᒃᑲᓂᕐᓗᑎᒃ ᓄᑭᖃᕐᓂᕐᓴᐅᓗᑎᒃ ᐱᓐᖑᐊᖃᑕᐅᓂᕐᓄᑦ,
  • ᑎᒥᖏᑦ ᐋᓐᓂᐊᒐᔪᐃᓐᓂᕐᓴᐅᓗᑎᒃ, ᐊᒻᒪᓗ
  • ᖃᓄᐃᓐᖏᑲᓐᓂᕋᓱᐊᕐᓂᕐᒥᒃ ᐅᐃᕆᓯᒪᓂᕐᓴᐅᓗᑎᒃ.

ᕼᐊᐅᕆ ᕙᓚᐅᕋᑎ, ᐊᖓᔪᖅᑳᖅ ᐊᒻᒪᓗ ᐊᐅᓚᑦᓯᔨᒻᒪᕆᒃ, ᐅᖃᓚᐅᕐᒥᔪᖅ; “ᐅᑉᐱᕈᓱᒃᑲᑦᑕ ᓱᕈᓯᖅ ᑳᒡᓗᓂ ᐃᓕᓐᓂᐊᕆᐊᖃᑦᑕᕆᐊᖃᓐᖏᒻᒪᑦ, ᐊᒻᒪᓗ ᐃᓕᓐᓂᐊᖅᑏᑦ ᐱᒋᐊᕈᑎᓖᑦ ᐅᓪᓗᖅ ᖃᐅᑎᓪᓗᒍ ᓂᕆᓯᒪᑦᓯᐊᓂᕐᒥᒃ ᓵᓐᖓᓂᕐᓴᐅᒍᓐᓇᖃᑦᑕᓲᑦ ᐃᓕᓐᓂᐊᖅᑕᒥᓄᑦ.”

ᕿᑭᖅᑖᓗᒃ ᑯᐊᐳᕇᓴᒃᑯᑦ ᓂᕆᐅᖕᓂᓖᑦ ᑕᒪᓐᓇ ᑎᑭᐅᑎᒍᑕᐅᖁᓪᓗᒍ ᐃᓕᓐᓂᐊᖅᑏᑦ ᑲᔪᓯᐊᑦᓯᐊᓂᕐᓴᐅᒍᑎᒃᓴᖏᓐᓄᑦ ᑕᐃᒪᐃᒻᒪᑦ ᐸᕐᓇᓯᒪᑦᓯᐊᕐᓂᖅ ᓯᕗᓕᕐᑎᐅᒍᒫᕐᓂᕐᒧᑦ ᐱᕙᓪᓕᐊᑎᑦᓯᒍᑎᒃᓴᓂᒃ ᕿᑭᖅᑕᓂ ᓄᓇᖓᓂ ᓯᕗᓂᒃᓴᑎᓐᓂᒃ.

- ᑐᓴᕋᑦᓴᑲᓐᓂᖅ –

ᕿᑭᖅᑖᓗᒃ ᑯᐊᐳᕇᓴᒃᑯᑦ ᐃᓄᐃᑦ ᓴᖅᑭᕐᓯᒪᔭᖓ ᑮᓇᐅᔭᓕᐅᕋᓱᐊᕈᑎᒃᓴᓄᑦ ᐱᕙᓪᓕᐊᓂᕐᒧᑦ ᓴᖅᑭᖅᑕᐅᓯᒪᔪᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᖏᓐᓂᒃ. ᑐᕌᒐᓕᒃ ᑎᒍᓯᕙᓪᓕᐊᓂᕐᒥᒃ ᐊᒻᒪᓗ ᐱᕙᓪᓕᐊᑎᑦᓯᓂᕐᒥᒃ ᒪᑭᒪᔾᔪᑎᑎᒍᑦ ᐊᒻᒪᓗ ᐃᖅᑲᓇᐃᔮᑎᒍᑦ ᐱᕝᕕᒃᓴᖃᖅᑎᑦᓯᓂᕐᒥᒃ ᐃᓄᖕᓂᒃ ᓄᓇᒥᖕᓂ. 83% ᐃᖅᑲᓇᐃᔭᖅᑎᖏᑦ ᐃᓄᐃᑦ, ᑲᒻᐸᓂ ᓯᕗᓪᓕᕐᐸᐅᔾᔭᐅᑎᑦᓯᔪᖅ ᐃᖅᑲᓇᐃᔭᖅᑎᑦᓯᓂᕐᒥᒃ ᐊᔪᕐᓇᖏᓐᓂᓕᒫᖓᒍᑦ ᐱᓕᒻᒪᒃᓴᐃᓂᕐᒥᓪᓗ ᐱᕝᕕᖃᖅᑎᓯᓂᕐᒧᑦ ᐃᓄᖕᓂᒃ ᐱᓕᕆᐊᓕᒫᖏᑎᒍᑦ.

ᑐᑭᓯᒋᐊᒃᑲᓂᕐᕕᒃᓴᖅ, ᖃᐅᔨᒋᐊᕐᓗᑎᑦ: 

ᕼᐊᐅᕆ ᕙᓚᐅᕋᑎ, ᐊᖓᔪᖅᑳᖅ ᐊᒻᒪᓗ ᐊᐅᓚᑦᓯᔨᒻᒪᕆᒃ
(867-979-8400)

ᐃᕐᖐᓐᓈᕈᑖ: hflaherty@corp.ca