ᕿᑭᖅᑖᓗᒃ ᑯᐊᐳᕇᓴᒃᑯᑦ ᐊᒻᒪ Scarlet ᐅᐊᑦᓯᔩᑦ ᑎᒥᖁᑖ ᓇᓗᓇᐃᖅᓯᕗᑦ ᑲᑐᔾᔨᖃᑎᒌᖕᓂᒃᑯᑦ ᐃᖅᑲᓇᐃᔭᖃᑎᒌᖕᓂᐊᕐᓂᕐᒥᖕᓂᒃ

Date: 
10 ᑎᓯᐱᕆ 2010

ᕿᑭᖅᑖᓗᒃ ᑯᐊᐳᕇᓴᒃᑯᑦ ᐃᓚᑖᒃᑲᓐᓂᕆᕗᑦ ᐃᖅᑲᓇᐃᔭᖃᑎᒋᓂᐊᖅᑕᒥᖕᓂᒃ Scarlet ᐅᐊᑦᓯᔩᑦ ᑎᒥᖁᑖᓂᒃ. ᑖᒃᑯᐊ ᐃᖅᑲᓇᐃᔭᖃᑎᖃᕐᓂᐊᖅᑐᑦ ᕿᑭᖅᑖᓗᒃ ᑯᐊᐳᕇᓴᒃᑯᓐᓂᒃ, ᐃᓄᖕᓄᑦ ᓇᖕᒥᓂᕆᔭᐅᔪᑦ ᑲᑉᐸᓂᐅᔪᑦ ᐊᒻᒪᓗ ᑐᑦᑕᕐᕕᖕᒥᒃ ᑎᑎᕋᕐᕕᖃᖅᖢᑎᒃ ᐃᖃᓗᖕᓂ.

ᕿᑭᖅᑖᓗᒃ ᑯᐊᐳᕇᓴᒃᑯᑦ/Scarlet ᐅᐊᑦᓯᔩᑦ ᑎᒥᖁᑖ ᐋᖅᑭᒃᓯᒪᕘᒃ ᐱᔨᑦᑎᖅᑎᐅᔪᓐᓇᕐᓂᐊᕋᒥᒃ ᐅᐸᒐᕐᓂᓐᖏᑦᑐᓄᑦ ᓴᓇᕕᐅᖃᑦᑕᖅᑐᓄᑦ, ᓲᕐᓗ ᐅᔭᕋᖕᓂᐊᕐᕕᖕᓄᑦ, ᐅᑭᐅᒃᑯᑦ ᐊᖅᑯᑎᓕᕆᓂᒃᑯᑦ/ᓯᑯᒃᑯᑦ ᐊᖅᑯᑎᓕᕆᓂᒃᑯᑦ, ᓱᓪᓗᑯᑖᓕᕆᓂᒃᑯᑦ ᐊᒻᒪᓗ ᐊᓯᖏᓐᓂᒃ ᐃᓄᐃᓪᓚᒦᑦᑐᓄᑦ ᑐᕌᖓᓗᐊᓐᖑᐊᖅᑐᓂᒃ ᐱᓕᕆᐊᖃᖃᑦᑕᕐᓗᑎᒃ.

ᕿᑭᖅᑖᓗᒃ ᑯᐊᐳᕇᓴᒃᑯᑦ ᐊᖓᔪᖅᑳᖓᑦ ᕼᐋᓕ ᕙᓚᐅᕈᑎ ᓂᕆᐅᖕᓂᕋᓚᐅᖅᑐᖅ ᑕᒪᒃᑮᖕᓂᒃ ᐱᓕᒻᒪᒃᓴᐃᓂᖅᑕᖃᕈᓐᓇᕐᓂᐊᕐᒪᑦ ᐃᖅᑲᓇᐃᔮᖅᑖᖅᑎᑕᐅᓗᑎᒡᓗ ᑕᒪᓐᓇ ᑲᑐᔾᔨᖃᑎᒌᖕᓂᖅ ᐊᖅᑯᑕᐅᓗᓂ “Scarlet-ᑯᓐᓂᒃ ᐃᖅᑲᓇᐃᔭᖃᑎᖃᕐᓂᕗᑦ ᐱᔨᑦᑎᕐᕕᒋᔭᑦᑎᓐᓄᑦ ᐃᑲᔫᑕᐅᓂᐊᖅᑐᖅ ᐊᒻᒪᓗ ᐱᓕᒻᒪᒃᓴᐃᒃᑲᓐᓂᕈᓐᓇᕐᓂᐊᖅᖢᑕ ᐱᕙᓪᓕᐊᑎᑦᑎᓂᕐᒥᒡᓗ ᓴᖅᑭᕝᕕᐅᒃᑲᓐᓂᕈᓐᓇᕐᓂᐊᖅᖢᑎᒃ ᐃᓄᖁᑎᕗᑦ”.

ᐹᑐᕆᒃ ᑐᐃᔪᓪ, Scarlet ᐅᐊᑦᓯᔩᑦ ᑎᒥᖁᑖᓄᑦ ᐊᖓᔪᖅᑳᕆᔭᐅᔪᖅ ᐃᒪᓐᓇ ᐅᖃᓚᐅᖅᑐᖅ, “ᑲᓇᑕᐅᑉ ᐅᑭᐅᖅᑕᖅᑐᖓᓂ ᐊᒥᓱᕐᔪᐊᒻᒪᕆᐊᓗᐃᑦ ᓴᖅᑭᑉᐸᓪᓕᐊᓂᖏᑦ ᖁᕕᐊᓇᖅᑐᖅ, ᐊᒻᒪᓗ ᐊᕗᖓᐅᔨᓯᒪᔪᒥᒃ ᐃᑲᔪᖅᑎᒌᒋᐊᖃᕐᓂᖅ ᐊᑐᕆᐊᖃᓪᓚᕆᒃᖢᓂ, ᓲᕐᓗ ᕿᑭᖅᑖᓗᒃ ᑯᐊᐳᕇᓴᒃᑯᑦ ᐃᑲᔪᕐᓂᖃᓪᓚᕆᖕᓂᐊᖅᑐᑦ ᐱᐅᓂᖅᐹᓂᒃ ᐱᔨᑦᑎᕈᑎᓂᒃ ᓴᖅᑭᔮᖅᑎᑦᑎᔪᓐᓇᕋᑦᑕ ᐱᔨᑦᑎᕈᓐᓇᕋᑦᑕᓗ ᑕᒪᒃᑯᐊ ᓴᖅᑭᑉᐸᓪᓕᐊᑎᓪᓗᒋᑦ. ᑲᑐᔾᔨᖃᑎᒌᖕᓂᒃᑰᖃᑎᒋᓗᒋᑦ ᐱᔨᑦᑎᕐᓂᕗᑦ ᐱᐅᓂᖅᐹᖑᓪᓚᕆᖕᓂᐊᖅᑐᖅ ᑕᒪᒃᑯᐊ ᐱᓇᐃᓗᑕᐃᑦ ᑕᒪᔾᔭᐅᒐᓗᐊᖅᑎᓪᓗᒋᑦ ᐊᒻᒪᓗ ᐃᖅᑲᓇᐃᔭᕐᕕᐅᔪᑦ ᐅᐸᒐᕐᓂᓐᖏᑦᑑᒐᓗᐊᖅᑎᓪᓗᒋᑦ ᓄᓇᕗᒻᒥ”.

ᐹᑐᕆᒃ ᑐᐃᔪᓪ ᐃᒪᓐᓇ ᐅᖃᒃᑲᓐᓂᓚᐅᖅᑐᖅ, “ᑕᒪᓐᓇ ᑲᑐᔾᔨᖃᑎᒌᖕᓂᖅ ᐊᑐᓗᐊᓐᖑᐊᕐᓂᐊᖅᑐᖅ ᑕᒪᒃᑮᒃ ᑎᒥᐅᔫᒃ ᓴᓐᖏᓂᖏᓐᓂᒃ ᐊᒻᒪᓗ ᐃᑲᔫᓯᐊᖅᑐᐃᓐᓇᐅᓂᐊᖅᖢᑎᒃ ᑕᐃᒃᑯᐊ ᐃᓚᐅᔪᑦ, ᐃᓚᓕᐅᓪᓗᒋᑦ ᑕᐃᒃᑯᐊ ᐱᔨᑦᑎᕐᕕᒋᔭᕗᑦ. ᑐᕌᒐᖃᓗᐊᓐᖑᐊᖅᑐᒍᑦ ᐅᐊᑦᓯᔨᓂᒃ ᐊᑐᐃᓐᓇᕈᐃᓯᒪᔨᐅᓗᑕ ᐃᓕᓐᓂᐊᖅᓯᒪᑦᑎᐊᖅᑐᓂᒃ ᐊᒻᒪᓗ ᐱᓕᒻᒪᒃᓯᒪᑦᑎᐊᖅᑐᓂᒃ, ᐃᖅᑲᓇᐃᔭᕐᓂᐊᖅᑎᓪᓗᒋᑦ ᐊᔾᔨᐅᓐᖏᑦᑐᒥ ᐊᒻᒪᓗ ᐅᐊᑦᓯᔭᐅᑦᑎᐊᕆᐊᖃᖅᑎᓪᓗᒋᑦ ᑖᒃᑯᐊ ᐱᔨᑦᑎᕐᕕᒋᔭᕗᑦ”.

ᕼᐋᓕ ᕙᓚᐅᕈᑎ ᐃᒪᓐᓇ ᐅᖃᒃᑲᓐᓂᓚᐅᖅᑐᖅ, “Scarlet ᐅᐊᑦᓯᔩᑦ ᑎᒥᖁᑎᖏᑦ ᐊᔪᓐᖏᓐᓂᖅᐹᖑᔪᑦ ᐊᒻᒪᓗ ᐱᓕᒻᒪᒃᓯᒪᓂᖅᐹᖑᓪᓗᑎᒃ ᑕᐃᒪᐃᑦᑐᓕᕆᔨᐅᔪᓂᑦ. Scarlet-ᑯᑦ ᐅᐊᑦᓯᔩᑦ ᑎᒥᖁᑖ ᓂᕈᐊᓚᐅᖅᑕᕗᑦ ᑎᖅᑲᖁᑎᖏᑦ ᐅᖃᓕᒫᖅᖢᒋᑦ ᐃᖅᑲᓇᐃᔭᑦᑎᐊᖅᓯᒪᓂᖏᓐᓄᑦ ᐊᒻᒪᓗ ᐃᓕᓐᓂᐊᖅᑎᑦᑎᔪᓐᓇᕐᓂᖏᑦ ᐱᔾᔪᑎᒋᓪᓗᑎᒃᑯᑦ, ᐃᖅᑲᓇᐃᔭᖃᑎᖃᖃᑦᑕᖅᓯᒪᓂᑰᓂᖏᓐᓄᓪᓗ ᐸᓖᓯᒃᑯᓐᓂᒃ ᐅᐊᑦᓯᔨᐅᓂᕐᒥᒡᓗ ᐃᓕᓐᓂᐊᕐᕕᐅᖃᑦᑕᖅᑐᓂ ᑲᓇᑕᒥ.”

- ᑐᑭᓯᒋᐊᒃᑲᓐᓂᐅᑏᑦ –

ᐅᐊᑦᓯᔩᑦ ᑎᒥᖁᑖ ᐃᖅᑲᓇᐃᔮᖃᓪᓗᐊᑕᖃᑦᑕᖅᑐᑦ ᑲᑉᐸᓂᐅᔪᒧᑦ ᐃᓕᖅᑭᒃᓯᒪᓪᓗᑎᒃ, ᖃᓄᖅᑑᕈᑎᒃᓴᓕᐅᖃᑦᑕᖅᖢᑎᒃ ᐅᑭᐅᖅᑕᖅᑐᒧᑦ, ᐃᓚᓕᐅᓪᓗᒋᑦ ᐅᔭᕋᖕᓂᐊᕐᕖᑦ, ᓱᓪᓗᑯᑖᓕᕆᔩᑦ ᐊᒻᒪᓗ ᐊᓯᖏᑦ ᐃᖅᑲᓇᐃᔭᖅᑐᑦ ᐅᐸᒐᕐᓂᓐᖏᑦᑐᓂ ᐃᓄᐃᓪᓚᒥᓗ. Scarlet-ᑯᑦ ᐅᐊᑦᓯᔩᑦ ᑎᒥᖁᑖ ᐃᖅᑲᓇᐃᔭᖅᑎᒥᖕᓂᒃ ᐅᑎᖅᑕᕋᐅᔭᖅᑎᑦᑎᖃᑦᑕᖅᓯᒪᔪᑦ, ᓲᕐᓗ ᓄᓘᔮᖕᓄᑦ ᐊᒻᒪᓗ ᒫᓐᓇ ᐅᐊᑦᓯᔨᐅᓪᓗᑎᒃ Tibbitt-ᑯᓐᓄᑦ ᑳᓐᑐᐃᑑ ᐅᑭᐅᒃᑯᑦ ᐊᖅᑯᓯᐅᖅᓯᒪᔭᖓᓐᓂ, ᑖᓐᓇᓗ ᐊᖅᑯᓯᐅᖅᑕᐅᓯᒪᔪᖅ ᑕᑭᓂᖅᐹᖑᓪᓗᓂ ᑕᒫᓂ. ᑳᓗᒫᒃ ᓯᑯᒃᑯᑦ ᐊᖅᑯᓯᐅᖅᓯᒪᔭᖓᓂ ᐅᐊᑦᓯᔨᐅᖕᒥᔪᑦ ᐊᒻᒪᓗ ᐱᓕᒻᒪᒃᓴᐃᔨᐅᖃᑦᑕᖅᖢᑎᒃ ᐊᐅᓚᑦᓯᔨᐅᓪᓗᑎᒡᓗ De Beers Snap Lake ᐅᔭᕋᖕᓂᐊᕐᕕᖓᑕ ᐊᖅᑯᑖᓂ.

ᕿᑭᖅᑖᓗᒃ ᑯᐊᐳᕇᓴᒃᑯᑦ ᓄᓇᕗᑦ ᓄᓇᑖᕐᓂᒃᑯᑦ ᓴᖅᑭᑕᐅᓯᒪᕗᖅ ᕿᑭᖅᑕᓂ ᐃᓄᐃᑦ ᑲᑐᔾᔨᖃᑎᒌᒃᑯᖏᓐᓄᑦ. ᐱᔭᒃᓴᖅᑖᖅᑎᑕᐅᓯᒪᕗᑦ ᐱᓇᓱᐊᖅᑎᐅᓂᕐᒥᒃ ᐱᕙᓪᓕᐊᑎᑦᑎᓂᕐᒥᒡᓗ ᑮᓇᐅᔭᓕᐅᕋᓱᐊᕈᑎᒃᓴᓂᒃ ᐊᒻᒪᓗ ᐃᖅᑲᓇᐃᔮᓂᒃ ᓄᐃᑦᑎᔨᐅᓂᕐᒥᒃ ᐃᓄᐃᑦ ᕿᑭᖅᑖᓗᖕᒥᐅᑦ ᑭᒡᒐᖅᑐᕐᓗᒋᑦ. ᐃᖅᑲᓇᐃᔭᖅᑎᖏᑦᑕ 70 ᐳᓴᓐᑎᖏᓐᓃᑦᑐᑦ ᐃᓄᓪᓚᕇᑦ, ᐊᒻᒪᓗ ᕿᑭᖅᑖᓗᒃ ᑯᐊᐳᕇᓴᒃᑯᑦ ᓯᕗᓪᓕᐅᔾᔨᓯᒪᓪᓚᕆᒃᐳᑦ ᐃᓄᖕᓂᒃ ᐃᖅᑲᓇᐃᔭᖅᑎᑦᑎᓂᕐᒥᒃ ᐱᓕᒻᒪᒃᓴᐃᓂᕐᒥᒡᓗ ᖃᓄᐃᑦᑐᑐᐃᓐᓇᕐᓂᒃ ᐃᖅᑲᓇᐃᔮᖑᔭᕆᐊᓕᖕᓂᒃ ᑎᒍᓯᓐᓂᕋᓗᐊᕈᑎᒃ.

ᑐᑭᓯᒋᐊᒃᑲᓐᓂᕈᒪᒍᕕᑦ ᐅᓇ ᖃᐅᔨᒋᐊᕐᕕᒋᔪᓐᓇᖅᑕᐃᑦ:

ᐹᑐᕆᒃ ᑐᐃᔪᓪ, (867) 920-2547 ᖃᕆᓴᐅᔭᒃᑯᑦ ᑐᕌᕈᑖ: patrickdoyle@scarletsecurity.ca